Gee noukeurig aandag aan persoonlike organisasie

¹ “As jy ’n taak gedoen wil hê, gee dit vir ’n besige persoon.” Die redenasie agter hierdie gesegde is dat ’n besige persoon gewoonlik goed georganiseerd is en derhalwe meer kan verrig. Ons almal het elke dag 24 uur tot ons beskikking. Dit hang dikwels van ons persoonlike organisasie af of ons daardie tyd verkwis of verstandig gebruik.

² Daar is altyd ‘volop te doen in die werk van die Here’ (1 Kor. 15:58, NW). Ons moet vergaderinge bywoon en aan die velddiens deelneem. Maar ons moet hiervoor voorberei. Met ander woorde, ons moet tyd aan studie afstaan sodat ons met welslae ‘dissipels kan maak’ en ander “tot liefde en goeie werke” kan aanspoor, soos ons beveel is om te doen (Matt. 28:19; Hebr. 10: 24). Die alledaagse lewensbedrywighede soos sekulêre werk, inkopies doen, eet, skoonmaak, reis, skool toe gaan en slaap het alles hulle plek. ’n Bietjie tyd word dalk ook aan ontspanning af gestaan. Dit is vir ons ’n uitdaging om alles op die regte plek in te pas. Hoe kan dit gedoen word?

BEPAAL, WAT DIE BELANGRIKSTE IS

³ Jesus het gesê: “Maar soek eers die koninkryk van God en sy geregtigheid, en al hierdie dinge sal vir julle bygevoeg word” (Matt. 6:33). Dit spreek vanself dat Koninkryksbelange voorkeur moet geniet wanneer dit kom by die gebruik van ons tyd. As ons ons tyd sou skeduleer soos ons ’n begroting opstel, sou ons die tyd wat ons opsysit vir Christenvergaderinge, gesinsbybelstudie en teokratiese bedrywighede soos die veldbediening en persoonlike studie nie gebruik om ander belange na te jaag nie.

⁴ Elke rooster moet die noodsaaklike lewensbedrywighede in ag neem. Tyd word opsygesit vir sekulêre werk om jou en jou gesin te onderhou. Eet en slaap, asook persoonlike aandag aan die behoeftes van jou gesin moet ingesluit word. Bo aan die prioriteitslys van ouere manne en bedieningsknegte is die tyd wat hulle daaraan bestee om vir teokratiese verantwoordelikhede voor te berei en dit na te kom. Sit gerus en stel so ’n rooster op, en kyk of onbelangrike dinge hoer op jou prioriteitslys is as wat dit behoort te wees?

HOU JOU OOG REG

⁵ Toe Jesus die werk van sy volgelinge bespreek het, het hy gesê: “As jou oog dan reg is, sal jou hele liggaam verlig wees” (Matt. 6:22). Wat sal dit behels? Dit beteken basies dat ’n mens jou lewe eenvoudig hou. Daar is baie afleidings wat ’n mens van tyd kan beroof. Televisie is een hiervan. In sommige huise word die televisiestel in die oggend aangeskakel en bly dit die hele dag aan. ’n Mens gaan sit dalk om na ’n kort program te kyk. Maar dan vind hy dat die tyd wat hy oorspronklik vir persoonlike studie of saam met die gesin wou gebruik, omvlieg terwyl hy aanhou om na ander programme te kyk. Hoe maklik is dit om ’n hele aand te mors sonder dat iets nuttigs gedoen is! Talle weet nie wanneer om die TV af te skakel nie. As jy hierdie probleem het, kan jy besluit dat dit die beste is om nie die televisie aan te skakel nie. Stokperdjies, ’n vorm van ontspanning vir sommige, kan ons ook mettertyd van tyd beroof wat vir belangriker dinge opsygesit is.

⁶ Jy kan kosbare tyd verspil deur aan sport deel te neem, sportbyeenkomste by te woon of op TV daarna te kyk. Dit sal goed wees as mans, vrouens en kinders toesien dat hulle nie van tyd beroof word wat hulle kon gebruik om te studeer en met ander om te gaan nie. Ons almal moet oppas dat ons nie ons lewe ingewikkeld maak met te veel sport of ontspanning nie.

⁷ Dit kan tot ’n ernstige probleem lei as ons toelaat dat sekulêre werk inbreuk maak op tyd wat ons vir prioriteite opsygesit het. Sommige is dalk so betrokke by hulle werk of so behep met die vooruitsigte op finansiële voordele dat hulle rooster nie meer voorsiening maak vir vergaderinge, die velddiens of hulle gesin se geestelikheid nie (Ef. 5:15,16). Dit is goed dat ons onsself afvra: ‘Wie sal werklik behae daarin skep as ek tyd wat ek reeds aan die aanbidding van Jehovah God toegewy het vir sekulêre belange uitkoop?’

MANIERE OM TYD DOELTREFFEND TE GEBRUIK

⁸ Ons moet geestelike doelwitte en ’n duidelike stel waardes hê as ons ons lewe wil organiseer sodat ons ons tyd so doeltreffend moontlik kan gebruik. Dit is die sleutel om daagliks te bepaal wat voorkeur moet kry. Moenie uitstel nie. As jy tyd opsygesit het om ’n werk te doen, moet jy dit vir daardie doel gebruik. Stel tydgrense vir jouself. Streef daarna om sekere materiaal lank genoeg voor die tyd te bestudeer sodat jy dit in die velddiens of by vergaderinge kan gebruik. Moet ook nie uitstel wat jou alledaagse take by die huis betref nie.

⁹ Leer die gewoonte aan om tyd te benut wat andersins verlore sou gaan. As jy byvoorbeeld vir ander moet wag, kan jy daardie tyd goed benut deur te lees, briewe te skryf of die een of ander belangrike taak te verrig. As jy in ’n ry staan, kan jy dalk ’n gesprek aanknoop wat tot ’n getuienis sal lei. Dit is ook belangrik dat almal genoeg rus en ontspan sodat hulle gesond en wakker bly. Dit sal jou in staat stel om beter te werk. Siekte as gevolg van te min rus of slaap kan veroorsaak dat jy nie behoorlike aandag skenk aan dinge wat van groot belang in die lewe is nie.

HOE OM PERSOONLIKE ORGANISASIE TE VERBETER

¹⁰ In die sakewêreld word baie tyd afgestaan en moeite gedoen om net te beplan hoe om ’n gegewe taak uit te voer. ’n Goeie sakeman vind dit lonend om werkers en materiaal te organiseer voordat ’n gegewe produk vervaardig word. Hy besef dat baie tyd en geld verlore kan gaan en hy nie ’n wins sal maak as die nodige werkers en materiale nie beskikbaar is wanneer en waar dit benodig word nie. Ons het egter veel edeler motiewe waarom ons onsself organiseer. Dit is onder andere ons begeerte om ’n goeie verhouding met Jehovah te behou, bekwaam in die dissipelmaakwerk te wees en ons doelwit, naamlik die ewige lewe, te bereik. Dit is derhalwe nodig dat ons seker maak dat ons die regte instrumente op die regte tyd beskikbaar het.

¹¹ Ons het byvoorbeeld elke week vyf gemeentelike vergaderinge. Die materiaal vir hierdie vergaderinge is op verskeie publikasies gebaseer. Is hierdie publikasies byderhand? Is Die Wagtoring wat ons daardie week bestudeer, opsygesit, of mors ons tyd om daarna te soek? En wat van ander belangrike publikasies, soos Ons Koninkryksbediening, die liedereboek, ’n Bybel en die publikasie wat ons by die Gemeentelike Boekstudie bestudeer? Dit is goed om ’n spesifieke plek vir hierdie items te hê en dit daar te hou wanneer dit nie gebruik word nie. Op hierdie manier kan ons die gepaste publikasies vinnig vind wanneer ons vir velddiens of vir vergaderinge voorberei.

¹² Ouere manne en bedieningsknegte moet veral op hulle persoonlike organisasie let. Omdat hulle soveel het om te doen op sekulêre gebied sowel as in die gemeente kan “die belangriker dinge” soms vergeet of opsy geskuif word (Filip. 1:10, NW). Dit kan waarlik voordelig wees as jy die wenk navolg om ’n prioriteitslys te hou. Het jy dit probeer? Een broer het so ’n lys en hersien dit voor elke vergadering. Op hierdie manier verrig hy baie en kan hy toesien dat die nodige werk in die gemeente gedoen word.

¹³ Ouere manne moet ’n goeie stelsel hê om op hoogte te bly van gemeentelike korrespondensie. Skryfwerk kan soms verwarrend en omslagtig wees as dit nie behoorlik georganiseerd is nie. Dit is derhalwe goed as ’n mens gereeld ’n paar minute afstaan om papiere uit te sorteer wat gehou moet word of vir iemand anders gegee moet word en dan die weg te gooi wat vernietig kan word. As jy briewe in jou besit het wat aan ander ouere manne gegee moet word, moet jy seker maak dat jy dit so gou moontlik doen. As jy ’n spesifieke plek in jou boeketas hou of briewe miskien in ’n afsonderlike koevert of vouer sit, kan dit jou help om op hoogte te bly van briewe en ander materiaal wat aandag nodig het. Op hierdie manier sal belangrike skryfwerk nie verloor of vertraag word nie.

ORGANISASIE​—’N SLAAF, NIE ’N MEESTER NIE

¹⁴ Nadat jy jou rooster hersien het, moet jy bepaal hoeveel organisasie jy nodig het. Ons wil nie fanatiese perfeksioniste word en ons persoonlike lewe so organiseer dat daar nie plek vir verskeidenheid is nie. Hou in gedagte dat elkeen van ons as individue unieke omstandighede het. Sommige van ons is ongetroud, sommige getroud. Wat vir een gesin werk, werk dalk nie vir ’n ander nie. Persoonlike organisasie behoort ons individuele en gesinsomstandighede in ag te neem. Lê goeie oordeel aan die dag en wees aanpasbaar in ooreenstemming met Bybelbeginsels wat as gids sal dien vir ’n doeltreffende rooster.​—Kyk Die Wagtoring van 15 September 1988, bladsye 28-30; Ontwaak! van 8 Desember 1987, bladsye 24-27; en Ontwaak! van 8 Maart 1966, bladsye 9-13.

¹⁵ In die laaste jare het vereenvoudiging deur beginsels van ordelikheid te volg meegebring dat Jehovah se aardse organisasie beter funksioneer. Sommige meen dalk dat hulle metodes het wat vir hulle persoonlik beter werk. Hulle wil graag hê dat die Genootskap ander moet aanmoedig om sulke metodes te gebruik, maar dikwels is dit oorweeg en afgekeur omdat dit nie prakties is met die oog op organisasie nie. In die belang van eenheid en doeltreffendheid is dit dus verstandig om die goedgekeurde organisatoriese prosedures te volg en maniere en metodes te gebruik wat verstaan en gebruik word deur ander wat dalk deur jou werk geraak word.

¹⁶ Jehovah is ’n God van orde en vrede (1 Kor. 14:33, 40). Hy het ’n vasgestelde tyd om sy wil en voorneme uit te voer (Hand. 1:7). Hy het in sy Woord liefdevol uiteengesit wat vir ons as onvolmaakte mense van belang is. Deur middel van Jesus Christus se leiding deur “die getroue en verstandige dienskneg” verskaf Jehovah nuttige instruksies oor hoe om die belangrikste werk wat vandag gedoen word uit te voer (Matt. 24:45-47; 28:19, 20; Pred. 12:13). As ons dus ag slaan op skriftuurlike vermanings wat in die Genootskap se publikasies gevind word, waaronder die tydige wenke in hierdie byvoegsel, kan ons onsself beter organiseer om ons bediening ten volle uit te voer.​—2 Tim. 4:5, vgl. NW.