Hoe gesinslede saamwerk om ’n volle deelname te hê—aan Bybelstudie
1 Die waarheid gee werklik sin en ’n doel aan gesinslewe, maar sukses in ons diens aan Jehovah kom nie vanself nie. Dit verg tyd en inspanning om ’n geestelike sterk huisgesin op te bou. Dit is baie belangrik dat gesinslede ten nouste saamwerk om dit te bereik. Hierdie artikel, die eerste van drie dele, sal die aandag vestig op hoe gesinne kan saamwerk om goeie studiegewoontes te ontwikkel.
2 Deur die Bybel elke dag te lees: Spreuke 24:5 sê: “’n Man van kennis ontwikkel krag.” Die kennis wat ’n mens inneem deur God se Woord gereeld te lees, gee jou die innerlike krag wat nodig is om Satan se aanvalle op jou geestelikheid af te weer (Ps. 1:1, 2, vgl. NW). Lees julle daagliks die Bybel saam as ’n gesin? Die Rooster vir die Teokratiese Bedieningskool bevat ’n “Rooster vir aanvullende Bybellees” vir elke week van die jaar. Dit neem elke dag maar net tien minute van ’n gesin se tyd. Kies ’n geskikte tyd, soos by ontbyt, ná aandete of voor julle gaan slaap, om die Bybel te lees en die dagteks uit die Ondersoek die Skrif-boekie te bespreek. Maak dit ’n deel van julle gesin se daaglikse roetine.
3 Deur elke week saam te studeer: Die gesinsbybelstudie moet die hoogtepunt van ’n gesin se week wees. Elke gesinslid behoort dit te ondersteun deur ywerig aan die studie deel te neem. Die gesinshoof moet die gesin se behoeftes in ag neem wanneer hy besluit oor die studiemateriaal en die dag, tyd en lengte van die studie. Laat die gesinstudie die belangrikste plek in die week se rooster beklee. Moenie toelaat dat minder belangrike sake daarop inbreuk maak nie.—Fil. 1:10, 11.
4 ’n Vader wat dikwels sakeoproepe tuis ontvang het, het die telefoon gedurende die gesinstudie van die mikkie afgehaal. As kliënte na die huis toe gekom het, is hulle genooi om by te sit tydens die studie of te wag totdat dit klaar is. Die vader was vasbeslote dat niks op die gesinstudie inbreuk sou maak nie. Dit het ’n diep indruk op sy kinders gemaak, en wat sy sakeonderneming betref, dit het floreer.
5 Hoe aangenaam is dit tog wanneer gesinslede in geestelike bedrywighede saamwerk! Getrouheid in ons pogings om ’n volle deelname aan die gesinsbybelstudie te hê, sal Jehovah se seën meebring.—Ps. 1:3.