Hoe gesinslede saamwerk om ’n volle deelname te hê—aan gemeentelike vergaderinge
1 Christengesinne moet gehoor gee aan die opdrag dat hulle gemeentelike vergaderinge moet bywoon (Heb. 10:24, 25). Met goeie samewerking kan almal vir die vergaderinge voorberei, dit bywoon en daaraan deelneem. Die omstandighede van gesinne verskil, maar daar is dinge wat ’n Christenman, ’n gelowige vrou of ’n enkelouer kan doen om gesinseenheid te bevorder wat geestelike sake betref, ongeag hoeveel kinders in die huis is en hoe oud hulle is.—Spr. 1:8.
2 Ruim tyd in om voor te berei: Gesinslede werk saam sodat elkeen goed voorbereid is vir gemeentelike vergaderinge. Baie gesinne bestudeer die artikel vir die weeklikse Wagtoring-studie saam. Party berei die Gemeentelike Boekstudie saam voor of lees die week se Skrifgedeelte as ’n gesin. Die doelwit is om die hoofpunte in gedagte te hê voor ons die vergaderinge bywoon. Sodoende sal almal groter baat vind by wat hulle hoor en toegerus wees om deel te neem wanneer die geleentheid hom voordoen.—1 Tim. 4:15.
3 Beplan om deel te neem: Dit moet elkeen in die gesin se doelwit wees om sy hoop voor ander bekend te maak deur by vergaderinge kommentaar te lewer (Heb. 10:23). Het ’n gesinslid hulp of bemoediging nodig om dit te doen? Watter hulp het elkeen nodig om toewysings vir die Teokratiese Bedieningskool voor te berei? Vrouens waardeer dit wanneer hulle mans belangstelling toon en dalk ’n gepaste illustrasie of ’n praktiese agtergrond voorstel. Ouers hoef nie te voel dat hulle programdele vir hulle jong kinders moet voorberei nie. Dit kan verhinder dat die kinders hulle eie inisiatief gebruik. Maar ouers kan hulle kinders help en kan luister wanneer hulle hardop oefen.—Ef. 6:4.
4 Tref reëlings om teenwoordig te wees: Kinders kan van kleins af geleer word om op ’n sekere tyd aangetrek en gereed te wees vir die vergadering. Gesinslede moet saam na huishoudelike take omsien sodat daar geen oponthoud is nie.—Sien wenke in die Gesinsgeluk-boek, bladsy 112, en die Jongmense vra-boek, bladsye 316-17.
5 Ouers sowel as kinders kan peins oor die woorde van Josua van ouds wat gesê het: “Ek en my huis, ons sal die HERE dien.” Wees dan vasbeslote om saam te werk sodat julle ’n volle deelname aan gemeentelike vergaderinge kan hê.—Jos. 24:15.