Ons word deur Jehovah geleer
1 Onder Goddelike leiding is daar tans ’n internasionale onderrigprogram in 233 lande aan die gang. Niks wat hierdie wêreld ons kan bied, kan hiermee vergelyk word nie. Ons Grootse Onderrigter, Jehovah, leer ons hoe om ons nóú te bevoordeel net soos hy ons ook met die oog op die ewige lewe onderrig.—Jes. 30:20, NW; 48:17, NW.
2 Skole van Goddelike onderrigting: Dink aan die skole wat tans tot voordeel van Jehovah se volk gehou word. Die Teokratiese Bedieningskool, wat weekliks in ongeveer 87 000 gemeentes gehou word, lei miljoene Koninkryksverkondigers op om die goeie nuus op ’n bekwame wyse te verkondig. Het jy vir die skool ingeskryf? Is jy onder die duisende wat al die twee weke lange Pionierdiensskool bygewoon het? Dalk sal die verminderde uurvereiste vir gewone pioniers dit vir meer moontlik maak om die pionierdiens te betree en aan die vereistes te voldoen om hierdie skool by te woon. Die twee maande lange Bedieningsopleidingskool, wat tans regoor die wêreld in die vernaamste tale gehou word, rus ongetroude ouer manne en bedieningsknegte toe vir groter teokratiese verantwoordelikhede. Van tyd tot tyd ontvang alle ouer manne en bedieningsknegte gespesialiseerde onderrigting in die Koninkryksbedieningskool.
3 Fasiliteite by die Wagtoring-onderrigsentrum in Patterson, New York, word vir drie spesiale skole gebruik wat gevorderde teokratiese opleiding gee. Die vyf maande lange kursus van die Wagtoring-Bybelskool Gilead berei bedienaars voor vir sendingwerk in die buiteland. Takkomiteelede uit alle wêrelddele woon ’n twee maande lange kursus oor die organisasie van takkantore by. In Mei 1999 het ’n nuwe twee maande lange kursus vir reisende opsieners begin met ’n klas van 48 studente uit die Verenigde State en Kanada. Met verloop van tyd kry al Jehovah se knegte groot voordele uit die opleiding wat Jehovah deur hierdie verskeie skole voorsien.
4 Geleer met watter doel? ’n Lid van die Bestuursliggaam het gesê: “Die doel van ons huidige onderrigprogram is om wêreldwyd Jehovah se volk in die voortreflike toestand van rypheid te bring wat in Spreuke 1:1-4 beskryf word.” Mag Jehovah voortgaan om aan elkeen van ons “’n geoefende tong [te gee]”.—Jes. 50:4.