“Vroue wat hard werk in die Here”
1 Met die woorde hierbo het Paulus twee hardwerkende susters in die gemeente in Rome, Trifena en Trifosa, beskryf. Van ’n ander een, Persis, het hy gesê: “Sy het baie in die Here gearbei.” Hy het ook gunstig na Febe verwys as “’n verdedigster van baie” (Rom. 16:2, 12). In die Skrif word Dorkas uitgesonder as iemand wat “oorvloedig in goeie dade en barmhartigheidsgawes” was (Hand. 9:36). Wat ’n seën is geestelike vroue tog vir die gemeente!
2 Waardeer ons die susters wat hard werk in ons gemeente? Hulle doen die grootste deel van die predikingswerk, hou die meeste van die Bybelstudies en help baie van die nuwelinge. Hulle bestee ook baie tyd daaraan om kinders te help om geestelik vordering te maak. Christenvroue doen hulle deel om die gees van liefde, vreugde, vrede en ywer in die gemeente op te bou. Hulle ondersteun hulle mans en ander gesinslede in baie opsigte sodat hulle meer in Jehovah se diens kan doen.
3 Susters in die voltydse diens: Onder diegene wat baie hard in die Here arbei, is die sendelingsusters, waarvan baie ’n aandeel gehad het in die uitbreiding van die werk in ander lande. In die gemeentes wat deur reisende opsieners bedien word, is hulle vrouens besig in die veldbediening en moedig hulle baie susters aan. Ons moet ook nie vergeet van die Bethelsusters wat ywerig heilige diens verrig ter ondersteuning van Jehovah se organisasie nie. En deur ons susters in die gewone pionierdiens se getroue inspanning om God te loof, help hulle duisende om die waarheid te leer.
4 Hierdie getroue vroue put groot bevrediging uit hulle selfopofferende lewenswyse (1 Tim. 6:6, 8). Hulle verdien ons lof en enige aanmoediging en ondersteuning wat ons hulle kan gee.
5 Christenvroue is ’n kosbare bate vir Jehovah se organisasie omdat hulle getroue diens ’n seën vir almal is. Laat ons aanhou om hierdie vroue te waardeer en te bid dat Jehovah hulle sal seën terwyl hulle voortgaan om “hard [te] werk in die Here”.