Ouers—Prent nuttige gewoontes by julle kinders in
1 Nuttige gewoontes word nie vanself en ook nie per toeval geleer nie. Dit verg ook tyd om goeie gewoontes by kinders in te prent. “Inprent” beteken om ‘deur herhaling iets in te skerp’ of om dit bietjie vir bietjie ‘te laat insink’. Dit verg konsekwentheid van ouers om ‘aan te hou om hulle kinders in die dissipline en verstandsregulering van Jehovah op te voed’.—Ef. 6:4.
2 Van kleintyd af: Klein kindertjies het ’n merkwaardige vermoë om nuwe dinge te leer en te doen. Hoewel volwassenes dit dikwels moeilik vind om ’n nuwe taal aan te leer, kan kleuters twee of drie tale tegelykertyd aanleer. Moet nooit dink dat jou kind te jonk is om goeie gewoontes aan te leer nie. As onderrigting in Bybelwaarheid vroeg begin en volgehou word, sal ’n kind se verstand, teen die tyd dat hy ’n paar jaar oud is, gevul wees met die kennis wat hom “wys [sal] maak tot redding”.—2 Tim. 3:15.
3 Maak velddiens ’n gewoonte: ’n Nuttige gewoonte om tydens ’n kind se vormingsjare by hom in te prent, is om gereeld die goeie nuus van God se Koninkryk te verkondig. Baie ouers begin hiermee deur hulle kinders van huis tot huis in die bediening te neem terwyl hulle nog babas is. Die ouers se gereelde deelname aan die getuieniswerk help hulle kinders om waardering en ywer vir die bediening te ontwikkel. Ouers kan hulle kinders leer hoe om in elke aspek van die diens ’n getuienis te gee.
4 Dit help kinders ook as hulle by die Teokratiese Bedieningskool aansluit. Dit leer hulle goeie studiegewoontes en hoe om met begrip te lees. Hulle leer om oor die Bybel te gesels, herbesoeke te doen en Bybelstudies te hou. Hierdie opleiding kan hulle aanspoor om die pionierdiens te betree of spesiale diensvoorregte na te streef. Baie Betheliete en sendelinge het goeie herinneringe aan hulle vroeë dae op die skool en beskou dit as ’n voorsiening wat hulle gehelp het om nuttige gewoontes aan te leer.
5 Ons is almal soos klei in die hande van die Groot Pottebakker, Jehovah (Jes. 64:8, NW). Hoe varser die klei, hoe makliker kan dit gevorm word. Hoe droër dit word, hoe harder word dit. Mense is dieselfde. Wanneer hulle jonk is, kan hulle makliker gevorm word—en hoe jonger, hoe beter. Hulle kinderjare is vormingsjare wanneer hulle ten goede of ten kwade gevorm word. As ’n ouer wat werklik omgee, moet jy vroeg begin om by jou kinders nuttige gewoontes in die Christelike bediening in te prent.