“By God is alles moontlik”

¹ Die vernaamste werk van die Christengemeente is om die Koninkryksboodskap wêreldwyd te verkondig (Matt. 24:14). Dit is ’n ontsaglike taak. Vir baie waarnemers lyk dit of hierdie werk baie meer krag verg as wat ons het. Vir ander is dit byna ondenkbaar om hierdie toewysing uit te voer omdat ons bespotting, teenstand en vervolging moet verduur (Matt. 24:9; 2 Tim. 3:12). Skeptici is oortuig dat dit onmoontlik is om hierdie werk te doen. Jesus het egter gesê: “By God is alles moontlik.”—Matt. 19:26.

² Positiewe voorbeelde om na te volg: Jesus het sy bediening begin as een man teen ’n hele stelsel van dinge. Teenstanders het hom probeer keer deur hom aan elke denkbare vernedering te onderwerp en hom uiteindelik ’n pynlike dood te laat sterf. Tog het Jesus aan die einde met oortuiging verklaar: “Ek het die wêreld oorwin” (Joh. 16:33). Waarlik ’n ongelooflike prestasie!

³ Jesus se dissipels het dieselfde onverskrokke gees en ywer in die Christelike bediening geopenbaar. Baie is gegesel, geslaan, in tronke gegooi en selfs doodgemaak. Tog het hulle “hulle verheug . . . omdat hulle waardig geag is om ter wille van sy naam oneer te ly” (Hand. 5:41). Teen alle waarskynlikheid het hulle hierdie skynbaar onmoontlike taak uitgevoer om die goeie nuus “tot in die mees afgeleë deel van die aarde” te verkondig.—Hand. 1:8; Kol. 1:23.

⁴ Hoe om in ons dag welslae te behaal: Ons het ook die Koninkrykspredikingswerk ywerig aangepak ondanks skynbaar onoorkomelike hindernisse. Ondanks verbooie, vervolging, gevangenskap en ander gewelddadige pogings om ons te keer, behaal ons welslae. Hoe is dit moontlik? “Nie deur krag of deur geweld nie, maar deur my Gees, sê die HERE van die leërskare” (Sag. 4:6). Met Jehovah se hulp kan niks ons werk keer nie!—Rom. 8:31.

⁵ Wanneer ons die predikingswerk doen, het ons geen rede om skaam of bevrees of onbekwaam te voel nie (2 Kor. 2:16, 17). Ons het kragtige redes om voort te beur in die verkondiging van die goeie nuus van die Koninkryk. Met Jehovah se hulp sal ons die ‘onmoontlike’ kan doen!—Luk. 18:27.