Gee ’n getuienis as goeie bure
1 Jesus het gesê “jy moet jou naaste liefhê soos jouself” (Matt. 22:39). Dit is ongetwyfeld so dat jy aan jou medegelowiges “goed doen”, maar kan jy verruim word in jou liefde teenoor die mense wat naby jou woon? (Gal. 6:10). Op watter maniere?
2 Deur jou te identifiseer: Weet jou bure dat jy ’n Getuie is? Indien nie, kan jy hulle gerus in die velddiens besoek. Dit kan verbasende resultate hê! Of as dit vir jou makliker sal wees, kan jy probeer om informeel vir hulle te getuig. Wanneer jy buitekant is, sien jy hulle dalk in hulle tuin werk of in die straat verbystap. Nader hulle met ’n vriendelike glimlag. Probeer om oor jou oortuigings te gesels, vir hulle te verduidelik waar die Koninkryksaal is en wat daar gebeur, en sê vir hulle wie anders in die buurt ook daarheen gaan. Nooi hulle na die vergaderinge. Wees vasbeslote om aan elkeen wat jy ken, ’n deeglike getuienis oor die goeie nuus te gee.—Hand. 10:42; 28:23.
3 Deur jou voorbeeldige gedrag: Jou vriendelike gedrag as ’n buurman spreek boekdele oor jou en kan jou die geleentheid bied om ’n getuienis te gee. Dit sal ook ‘die leer van God versier’ (Tit. 2:7, 10). Toon opregte belangstelling in jou bure. Wees vriendelik en simpatiek. Respekteer hulle reg op privaatheid en ’n stil omgewing. As een van hulle siek word, wees bedagsaam en bied aan om te help. Wanneer ’n nuwe gesin in die buurt intrek, gaan verwelkom hulle. Sulke goedhartigheid skep ’n gunstige indruk en behaag Jehovah.—Heb. 13:16.
4 Deur die voorkoms van jou eiendom: Om ’n goeie buurman te wees, beteken ook dat jy na jou huis moet omsien sodat dit netjies lyk. ’n Huis en erf wat skoon en mooi is, is op sigself ’n getuienis. Maar as ’n huis vuil is en daar rommel in die werf rondlê, sal dit waarskynlik afbreuk doen aan die Koninkryksboodskap. Dit is dus baie belangrik om jou huis, erf en voertuie skoon en in ’n goeie toestand te hou.
5 As jy besorgdheid toon teenoor diegene buite die Christengemeente, openbaar jy liefde vir jou naaste. Wat kan die gevolg wees? Party van hulle sal heel moontlik “as gevolg van julle voortreflike werke waarvan hulle ooggetuies is, God . . . verheerlik”.—1 Pet. 2:12.