Streekbyeenkomste—’n Vreugdevolle tyd!

¹ Die streekbyeenkomste van Jehovah se Getuies is baie vreugdevolle geleenthede. Hierdie samekomste dra al meer as honderd jaar lank by tot die vermeerdering wat in ons organisasie plaasvind. Van ’n klein begin af het ons Jehovah se ryk seën op ons wêreldwye werk gesien. By ons eerste streekbyeenkoms in hedendaagse tye, in Chicago, Illinois, in 1893, is altesaam 70 van die 360 wat teenwoordig was, gedoop om hulle toewyding aan Jehovah te simboliseer. Verlede jaar se reeks “Daders van God se woord”-streekbyeenkomste is deur altesaam 9 454 055 bygewoon, en 129 367 is gedoop. Wat ’n wonderlike rede om ons te verheug!

² Van Bybeltye af was die samekomste van God se volk ’n belangrike manier om onderrigting van Jehovah af oor te dra. In die tyd van Esra en Nehemia het die volk “vandat dit lig geword het tot die middag” na die voorlesing van die Wet geluister (Neh. 8:3, 4). Omdat hulle by daardie geleentheid ’n beter begrip van die Wet verkry het, het die volk “groot vreugde” ondervind (Neh. 8:9, 13). Ons is ook verheug dat streekbyeenkomste ons ’n uitstekende geleentheid bied om heilsame onderrigting en geestelike voedsel “op die regte tyd” van Jehovah af deur middel van “die getroue en verstandige slaaf” te ontvang (Matt. 24:45). Aangesien Jesus gesê het dat die mens moet lewe “van elke uiting wat deur Jehovah se mond uitgaan”, is streekbyeenkomste onontbeerlik vir ons geestelike welsyn.—Matt. 4:4.

³ Dit is beslis die moeite werd om dit by te woon: Ons almal moet dit ons persoonlike doelwit maak om vanjaar die hele “Onderrigters van God se woord”-streekbyeenkoms by te woon. Ons moet beplan om elke dag vroeg daar te wees en te bly totdat ons saam met almal “Amen!” op die slotgebed kan sê. Ons sal dalk ons rooster moet aanpas om dit te kan doen. Dit sal moontlik moeilik wees om verlof van ons sekulêre werk te kry. Ons moet ’n ferm standpunt inneem en niks aan die toeval oorlaat nie. As ons verblyf en/of vervoer nodig het, moet ons vroegtydig reëlings tref. Ongeag watter opofferings ons moet maak, dit sal die moeite werd wees!

⁴ Jehovah se volk meet nie die seëninge wat hulle ontvang as hulle ’n byeenkoms bywoon, in rande en sente nie. Kyk na die voorbeelde van party wat vasbeslote was om die Goddelike Wil- Internasionale Byeenkoms van Jehovah se Getuies in 1958 in die stad New York by te woon. Een broer het sy bouonderneming twee weke lank gesluit om sy hulp aan te bied en die byeenkoms by te woon. ’n Broer op die Maagde-eilande het twee hektaar grond verkoop sodat sy hele gesin van ses die byeenkoms kon bywoon. ’n Jong egpaar het hulle motorboot verkoop sodat hulle al drie hulle kinders, tussen die ouderdomme van twee maande en sewe jaar, na die byeenkoms kon neem. Daar is vir drie vleeslike broers van Kalifornië gesê dat hulle in die pad gesteek sou word as hulle nie werk toe kom nie. Dit het hulle egter nie daarvan weerhou om daardie onvergeetlike byeenkoms by te woon nie.

⁵ Jehovah beloon ons ywerige pogings: Jehovah sien die pogings van sy volk en seën dit (Heb. 6:10). Diegene wat byvoorbeeld die “Teokrasie se Vermeerdering”-byeenkoms in 1950 bygewoon het, het die epogmakende toespraak “Nuwe stelsels van dinge” gehoor. Broer Frederick Franz het die belangstelling van almal aangewakker toe hy gevra het: “Sal dit hierdie internasionale samekoms bly maak om te weet dat daar vanaand, hier, in ons midde, ’n aantal toekomstige vorste van die nuwe aarde is?” Meer as 50 jaar later verheug ons ons nog oor die duideliker begrip wat ons van Psalm 45:17 gekry het.

⁶ Ná verlede jaar se streekbyeenkoms het ’n gesinshoof sy waardering uitgespreek deur die volgende te skryf: “Broers, julle sal nooit weet hoe tydig hierdie byeenkoms was nie. Ons gesin het na die stad toe getrek weens sekulêre werk en toe gevind dat ons geestelikheid agteruitgaan. . . . Ons het toegelaat dat ons ons Christelike verpligtinge verwaarloos. Ons het selfs nie meer ’n enkele vergadering bygewoon of enige velddiens gedoen nie. . . . Hierdie byeenkoms het ons verkwik, en ons stel nou weer geestelike doelwitte en is vasbeslote om dit te bereik.”

⁷ Jehovah voorsien ons van die geestelike voedsel wat ons nodig het. Hy dek ’n oorvloedige tafel by ons streekbyeenkomste. Ons waardering vir hierdie voorsiening moet ons in staat stel om te sê wat Kornelius gesê het toe die apostel Petrus hom besoek het: “Ons is dan nou almal voor God teenwoordig om alles te hoor wat u deur Jehovah beveel is om te sê” (Hand. 10:33). Laat ons dit ons doelwit maak om gedurende elke sessie van hierdie jaar se “Onderrigters van God se woord”-streekbyeenkoms “voor God teenwoordig” te wees en ons te verheug!