Waardeer jy heilige dinge?
1 As ons gevra word of ons heilige dinge waardeer, sal ons waarskynlik vinnig ja antwoord! Wat is van God se heilige voorsienings wat ons waardeer?
2 Hoe koester ons tog nie die persoonlike verhouding wat ons met ons hemelse Vader kan hê nie! Hy verseker ons dat ‘hy nader aan ons sal kom, as ons nader aan hom kom’ (Jak. 4:8). Sonder die losprysofferande van Jesus Christus kan geen mens die ewige lewe ontvang nie (Joh. 3:16). Uit opregte dankbaarheid spreek ons daagliks in gebed ons diepe waardering uit vir hierdie kosbare gawe van God.
3 God se geïnspireerde Woord, die Heilige Bybel, is ook vir ons heilig, net soos Jehovah se aardse organisasie. Ons toon gepaste waardering vir hierdie voorsienings van Jehovah wanneer ons volgens Bybelbeginsels lewe, die bande van broederliefde versterk, teokratiese orde nougeset bewaar en met diegene wat die leiding neem, saamwerk.—1 Pet. 1:22.
4 Deur die getroue en verstandige slaaf ontvang ons ’n oorvloed geestelike voedsel. Dit sal vanjaar die geval wees by die “Daders van God se Woord”-streekbyeenkoms. Daar sal ons lewensbelangrike onderrigting ontvang en hartlike assosiasie geniet wat ons so nodig het. Hoe kan ons hartgrondige waardering vir hierdie heilige voorsiening toon?
5 Moenie Jehovah se huis verwaarloos nie: Nehemia het diegene wat hard gewerk het om Jerusalem se mure te herbou, vermaan ‘om nie die huis van hulle God te verwaarloos nie’ (Neh. 10:39). Vandag is Jehovah se “huis” sy reëling vir aanbidding. Ons streekbyeenkomste is deel van hierdie reëling. As ons nie hierdie reëling wil verwaarloos nie, moet ons daar teenwoordig wees en goed aandag skenk om vir Jehovah te toon dat ons sy voorsienings hoog op prys stel (Heb. 10:24, 25). Watter reëlings moet ons dus nou tref om te toon dat ons hierdie heilige gebeurtenis ten volle waardeer?
6 Woon al drie dae by: Elkeen van ons moet reël dat ons al drie dae van die byeenkoms teenwoordig is. Is jy van plan om elke dag vroeg daar te wees en om tot ná die slotgebed Sondag te bly? Indien wel, sal daar vir jou ryk seëninge wees. Dit is dalk nie altyd maklik om ’n byeenkoms by te woon nie. As jy jou sekulêre werk daarvolgens moet aanpas, sal dit moontlik beteken dat jy ’n ferm standpunt moet inneem. Vervoer is dalk nie altyd gerieflik nie. Maar moenie dat hierdie faktore jou ontmoedig om die byeenkoms by te woon nie.
7 Dink na oor hierdie uitstekende voorbeeld: Verlede jaar, op pad na ’n streekbyeenkoms, het ’n groepie broers in ’n Afrikaland waar daar burgerlike oproerigheid was ’n militêre groep teëgekom. Die broers is gevra: “Wie is julle, en waarheen is julle op pad?” Hulle het geantwoord: “Ons is Jehovah se Getuies en ons is op pad om ons streekbyeenkoms by te woon.” Een van die soldate het gesê: “Jehovah se Getuies is ook vir niks bang nie. Gaan maar, en julle sal julle byeenkoms sonder enige probleme kan hou. Maar wees versigtig, want julle gaan baie soldate teëkom. Loop altyd in die middel van die pad! As julle ’n klomp mense bymekaar sien, hou net aan om in die middel van die pad te loop!” Hulle het dit gedoen en veilig by die byeenkoms aangekom. Hierdie broers is beloon omdat hulle hulle waardering vir heilige dinge getoon het.
8 Soos hierdie broers in Afrika kom ons ook voor uitdagings te staan. Maar ons kan ongetwyfeld hulle geloof navolg en ons voorneem om al die sessies van ons streekbyeenkoms by te woon. Wanneer aanpassings nodig is, moet jy jou tot Jehovah wend vir leiding in die wete dat hy ons pogings om die hele program by te woon, sal seën.
9 Geniet die seëninge: Ons verlang na die Woord van God, want ons weet dat ons daardeur tot redding kan groei (1 Pet. 2:2). As ons die streekbyeenkoms bywoon en na die program luister, sal dit elkeen van ons help om ’n sterker geloof in daardie Woord op te bou en dus groter weerstand teen Satan se aanvalle te kan bied. Sodoende sal ons vir Jehovah en almal wat na ons kyk, wys dat ons heilige dinge ten volle waardeer en ‘nie die soort is wat terugdeins nie, maar die soort is wat geloof het tot die behoud van die siel’.—Heb. 10:39; 12:16; Spr. 27:11.
10 Ons sien daarna uit dat Jehovah God die vensters van die hemel sal oopmaak en oorvloedige geestelike seëninge op ons sal uitstort (Mal. 3:10). Stel jou dit ten doel om by die “Daders van God se Woord”-streekbyeenkoms teenwoordig te wees reg van die begin van Vrydagoggend se program af tot die slotgebed en “Amen!” Sondagmiddag. Jy sal bly wees jy het!