Bereik die hart van jou student
1 Voordat Jesus opgevaar het hemel toe, het hy vir sy dissipels gesê om ander te leer om al die dinge te “onderhou” wat hy beveel het (Matt. 28:19, 20). As iemand Christus se bevele gaan “onderhou”, moet die inligting sy hart bereik (Ps. 119:112). Hoe kan jy die hart raak van iemand met wie jy die Bybel studeer?
2 Bid vir Jehovah se leiding: Die dissipelmaakwerk is God se werk. Sy seën, nie ons vermoëns nie, is onontbeerlik vir sukses (Hand. 16:14; 1 Kor. 3:7). Dit is dus noodsaaklik om te bid dat Jehovah ons help wanneer ons die waarheid aan ander leer.—Jes. 50:4.
3 Onderskei wat die student glo: As ons weet wat mense glo en waarom hulle dit glo, kan dit ons insig gee sodat ons weet wat om te sê om hulle hart te bereik. Waarom wil ’n student graag aan ’n sekere leerstelling glo? Wat het hom daarvan oortuig om dit te glo? Hierdie kennis kan ons help om met onderskeidingsvermoë te praat.—Hand. 17:22, 23.
4 Ontwikkel ’n logiese, skriftuurlike redenasie: Die waarheid moet vir die student sin maak (Hand. 17:24-31). Ons moet ’n goeie rede vir ons hoop gee (1 Pet. 3:15). Maar doen dit altyd op ’n vriendelike, geduldige manier.
5 Vul dit aan met illustrasies: Illustrasies maak dit nie net vir die student makliker om te verstaan nie, maar dit wek ook emosies. Dit raak die verstand sowel as die hart. Jesus het dit dikwels gebruik (Mark. 4:33, 34). Om doeltreffend te wees, moet die illustrasie natuurlik van toepassing wees op die punt wat bespreek word, en dit moet verband hou met die lewe van die student.
6 Toon watter voordele dit inhou om die waarheid aan te neem: Mense wil weet watter voordele dit inhou om toe te pas wat hulle leer. Help jou student om die wysheid van Paulus se woorde in 2 Timoteus 3:14-17 te sien.
7 Moenie mismoedig raak as party nie gunstig op jou onderrigting reageer nie. Nie alle harte is ontvanklik nie (Matt. 13:15). Maar party individue word wel gelowiges (Hand. 17:32-34). Mag jou pogings om harte met die goeie nuus te bereik baie meer mense help om wat Jesus beveel het, aan te neem en te “onderhou”.