Waarom moet ons aanhou met die predikingswerk?
1 Word die Koninkrykspredikingswerk al lank in julle gemeenskap gedoen? (Matt. 24:14). Indien wel, voel jy dalk dat die gemeente se gebied voldoende gedek is. Wanneer jy nou die predikingswerk doen, lyk dit dalk asof die meeste mense wat jy teëkom, onverskillig teenoor die Koninkryksboodskap is. Let nietemin op wat die Jesaja se profesie II-boek op bladsy 141 oor Jesus se ware dissipels erken: “In sommige plekke lyk dit dalk asof die resultate van hulle bediening gering is wanneer dit vergelyk word met die hoeveelheid werk en inspanning wat dit verg. Nogtans volhard hulle.” Maar waarom moet ons aanhou met die predikingswerk?
2 Dink aan Jeremia: Ons getroue volharding in die predikingswerk moenie daarvan afhang of mense na ons luister of nie. Jeremia het 40 jaar lank in dieselfde gebied getuig hoewel baie min na hom geluister het en talle teen sy boodskap gekant was. Waarom het Jeremia volhard? Omdat hy ’n werk gedoen het wat God hom beveel het om te doen, en weens sy kennis van wat in die toekoms sou gebeur, het hy verplig gevoel om met vrymoedigheid te bly praat.—Jer. 1:17; 20:9.
3 Ons is in ’n soortgelyke situasie. Jesus het “ons beveel om vir die volk te preek en om ’n deeglike getuienis te gee dat dit die Een is wat deur God verorden is om regter van die lewendes en die dooies te wees” (Hand. 10:42). Die boodskap wat ons oordra, is ’n saak van lewe en dood vir diegene wat dit hoor. Mense sal geoordeel word op grond van hulle reaksie op die goeie nuus. Aangesien dit die geval is, is dit ons verantwoordelikheid om presies te doen wat ons beveel is om te doen. Selfs wanneer mense weier om te luister, gee dit ons die geleentheid om te toon hoe innig ons liefde vir hulle is en hoe toegewyd ons aan Jehovah is deur aan te hou doen wat ons moet. Maar dit is nie al nie.
4 Ons trek voordeel daaruit: Om God se wil te doen, ongeag die reaksie in die gebied, gee ons gemoedsrus, tevredenheid en vreugde, wat op geen ander manier gevind kan word nie (Ps. 40:8). Ons lewe word werklik sinvol en doelgerig. Hoe meer ons aan die bediening deelneem, hoe meer vestig ons ons hart en verstand op die hoop en vreugde om in God se nuwe wêreld te lewe. As ons nadink oor hierdie skriftuurlike beloftes, bou dit ons geestelikheid op en versterk dit ons verhouding met Jehovah.
5 Al sien ons nie onmiddellike resultate in ons predikingsbedrywighede nie, is ’n saadjie van waarheid dalk in iemand se hart geplant wat op Jehovah se bestemde tyd sal ontkiem (Joh. 6:44; 1 Kor. 3:6). Nie een van ons weet hoeveel mense nog deur middel van die werk van Jehovah se volk, hetsy plaaslik of regoor die wêreld, van die Koninkryk sal leer nie.
6 Ons moet, soos nog nooit tevore nie, luister na Jesus se opdrag: “Bly op die uitkyk, bly wakker, want julle weet nie wanneer dit die vasgestelde tyd is nie. Maar wat ek vir julle sê, sê ek vir almal: Hou aan waak” (Mark. 13:33, 37). Mag ons almal dan aanhou om die goeie nuus van die Koninkryk te verkondig en Jehovah se hart bly maak terwyl ons ’n aandeel daaraan het om sy groot naam te heilig.