Waarom ons herhaaldelik teruggaan
1. Watter vraag ontstaan in verband met ons predikingswerk?
1 Op baie plekke dek ons ons gebied taamlik gereeld. Ons bly herhaaldelik teruggaan na dieselfde huise, al het die huisbewoner dalk vir ons gesê dat hy nie belangstel nie. Waarom bly ons mense besoek wat in die verlede nie gunstig gereageer het nie?
2. Wat is die hoofrede waarom ons in die bediening volhard?
2 Liefde vir Jehovah en vir mense: Die hoofrede waarom ons in die bediening volhard, is ons liefde vir Jehovah. Ons hart beweeg ons om voort te gaan om ander van ons groot God te vertel (Luk. 6:45). Ons liefde vir Jehovah spoor ons aan om sy gebooie te gehoorsaam en ander te help om dit ook te doen (Spr. 27:11; 1 Joh. 5:3). Ons getroue volharding in hierdie werk hang nie af van mense se reaksie nie. Selfs toe die eerste-eeuse Christene vervolg is, het hulle “sonder ophou” voortgegaan om te preek (Hand. 5:42). Wanneer mense weier om te luister, laat ons nie toe dat dit ons ontmoedig nie, maar ons bly standvastig en toon sodoende hoe innig ons liefde vir Jehovah is en hoe toegewyd ons aan hom is.
3. Hoe sal liefde vir mense ons help om aan te hou preek?
3 Ons volhard ook omdat ons ons naaste liefhet (Luk. 10:27). Jehovah wil nie hê dat enigeen vernietig moet word nie (2 Pet. 3:9). Selfs in gebiede wat gereeld gedek word, vind ons nog steeds mense wat Jehovah wil dien. Op Guadeloupe, waar 1 uit elke 56 mense een van Jehovah se Getuies is, is 214 mense byvoorbeeld verlede jaar gedoop. Byna 20 000 het die Gedenkmaal bygewoon, omtrent 1 uit elke 22 mense op Guadeloupe!
4. In watter opsigte verander gebiede?
4 Veranderinge in die gebied: Die samestelling van ons gebied verander gedurig. Wanneer ons huise weer besoek waar mense nie gunstig gereageer het nie, kan ’n ander lid van die gesin—dalk een wat nog nooit ons boodskap gehoor het nie—die deur oopmaak en luister. Of ons vind dalk nuwe huisbewoners wat wel belangstel. Kinders wie se ouers ons teëstaan, word groot en verlaat die huis. Hulle sal dalk bereid wees om na die Koninkryksboodskap te luister.
5. Wat kan veroorsaak dat mense ontvankliker word?
5 Mense verander ook. Die apostel Paulus was vroeër “’n lasteraar en ’n vervolger en ’n vermetele man” (1 Tim. 1:13). Net so het baie mense wat Jehovah vandag dien, voorheen nie in die waarheid belanggestel nie. Party het voorheen die goeie nuus dalk selfs teëgestaan. Wanneer wêreldtoestande verander, word party teenstanders of dié wat onverskillig was, dalk beweeg om te luister. Ander is moontlik ontvankliker ná ’n persoonlike tragedie, soos die dood van ’n familielid, afdanking of ’n finansiële of ’n gesondheidsprobleem.
6. Waarom moet ons voortgaan om met ywer te preek?
6 Hierdie stelsel van dinge sal binnekort tot ’n einde kom, maar ons predikings- en onderrigtingswerk word bespoedig (Jes. 60:22). Daarom gaan ons voort om met ywer te preek en streef ons daarna om ’n positiewe gesindheid te behou. Die volgende persoon met wie ons praat, sal dalk luister. Ons moet aanhou praat! ‘Deur dit te doen, sal ons onsself red sowel as dié wat na ons luister.’—1 Tim. 4:16.