Mense word uit al die tale versamel
1 God se Woord word vervul! Mense “uit al die tale van die nasies” neem ware aanbidding aan (Sag. 8:23). Hoe help Jehovah se Getuies individue uit alle ‘stamme, volke en tale’ om ’n rein posisie voor Jehovah te verkry, met die vooruitsig om “die groot verdrukking” te oorleef?—Op. 7:9, 14.
2 God se organisasie tree op: Die Bestuursliggaam het gereël dat Bybellektuur in sowat 380 tale beskikbaar gestel word sodat mense in alle wêrelddele die belangrikheid van die goeie nuus duidelik kan verstaan. Dit is ’n ontsaglike taak om lektuur in soveel tale voor te berei en te druk. Dit behels dat spanne bekwame vertalers byeengebring word en dat hulle die nodige hulp gegee word om ons lektuur in al hierdie tale te vertaal. Die materiaal moet ook gedruk en versend word. Individuele Koninkryksverkondigers, wat die Bybel se lewensreddende boodskap aan die mense bring, speel egter die sleutelrol.
3 Aanvaar die uitdaging: Daar is baie anderstalige mense met verskillende agtergronde in ons gebied. Om al hierdie taalgroepe met die goeie nuus te bereik, probeer al hoe meer van God se knegte ’n ander taal aanleer wat in hulle gebied gepraat word. Ander leer gebaretaal. In die gebied onder die Suid-Afrikaanse takkantoor is daar sowat 1 360 gemeentes en groepe wat die predikingswerk in 10 ander tale as Engels doen. Party wat nog nie tevore van Jehovah gehoor het nie of glad nie die Bybel geken het nie, neem nou die waarheid van God se Woord aan.—Rom. 15:21.
4 Kan ons ons nog meer inspan om die goeie nuus aan mense in ons gebied te verkondig wat ’n ander kultuur het? (Kol. 1:25). Party gemeentes reël om die predikingswerk in een van die baie plaaslike tale te doen. Verkondigers leer eers net genoeg van die taal om ’n eenvoudige aanbieding te doen, soos: “Hallo. Ek het goeie nuus vir jou. [Bied dan ’n traktaat of brosjure aan wat in daardie taal beskikbaar is.] Totsiens.” Jehovah seën inderdaad sulke pogings al is dit aanvanklik klein!
5 Die Koninkryksboodskap vind byval by mense uit alle agtergronde en tale. Kom ons gryp die geleentheid aan om dit aan hulle te verkondig.