Die Christelike bediening—Ons vernaamste werk
1 Ons almal het werk waarna ons moet omsien. Dit is ’n goddelike vereiste om vir ons gesin te sorg (1 Tim. 5:8). Maar die werk wat ons moet doen om daardie goddelike vereiste na te kom, moet nie die Koninkrykspredikings- en dissipelmaakwerk oorskadu nie.—Matt. 24:14; 28:19, 20.
2 Jesus het vir ons ’n voorbeeld gestel deur “eers die koninkryk . . . te soek” (Matt. 6:33; 1 Pet. 2:21). Hoewel hy materieel min gehad het, het hy hom ten volle daaraan toegewy om sy Vader se wil te doen (Luk. 4:43; 9:58; Joh. 4:34). Hy het hom ingespan om by elke geleentheid te getuig (Luk. 23:43; 1 Tim. 6:13). Hy het sy dissipels aangespoor om daardie selfde intense belangstelling in die oeswerk te toon.—Matt. 9:37, 38.
3 Volg Jesus vandag na: Ons kan Jesus se voorbeeld navolg deur ’n eenvoudige lewe te probeer lei wat om die Christelike bediening draai. As ons die basiese lewensbenodigdhede het, moet ons die Bybelraad volg om nie nog meer materiële dinge op te gaar nie (Matt. 6:19, 20; 1 Tim. 6:8). Hoeveel beter is dit tog om eerder ons aandeel aan die predikingswerk te probeer vergroot! As ons met moeilike omstandighede te kampe het, moet ons ons soos Jesus inspan en nie toelaat dat die sorge van die lewe ons vernaamste werk, naamlik die verkondiging van die goeie nuus van die Koninkryk, oorskadu nie.—Luk. 8:14; 9:59-62.
4 Selfs diegene met baie verantwoordelikhede stel die predikingswerk eerste. ’n Broer wat ’n groot gesin en ’n verantwoordelike werk het en ook as ’n ouer man in die Christengemeente dien, sê: “Ek beskou die bediening as my loopbaan.” ’n Pioniersuster sê: “Die pionierdiens is vir my baie meer werd as ’n suksesvolle sekulêre loopbaan.”
5 Mag ons, ongeag ons omstandighede, Jesus se voorbeeld navolg. Hoe? Deur die Christelike bediening ons vernaamste werk te maak.