Volg Jesus se geestesgesindheid na
1. Watter geestesgesindheid het Jesus geopenbaar?
1 Hoewel ons nog nooit God se Seun gesien het nie, het ons, deur middel van die geskrewe verslag oor Jesus se lewe en bediening, werklik lief vir hom geword (1 Pet. 1:8). In gehoorsaamheid aan sy Vader se wil het hy sy verhewe posisie in die hemel verlaat en na die aarde toe gekom. As ’n mens het hy ander onselfsugtig gedien en later sy lewe ten behoewe van die mensdom gegee (Matt. 20:28). God se Woord spoor ons aan: “Bewaar hierdie geestesgesindheid in julle wat ook in Christus Jesus was.” Hoe kan ons sy selfopofferende gesindheid navolg?—Fil. 2:5-8.
2. Watter probleem ondervind baie Christene, en wat kan hulle help om dit te oorkom?
2 Wanneer ons moeg voel: Jesus het moeg geword al was hy volmaak. By een geleentheid, toe hy “moeg was van die reis”, het hy ’n deeglike getuienis vir ’n Samaritaanse vrou gegee (Joh. 4:6). Baie Christene ondervind vandag dieselfde probleem. Ná ’n vermoeiende werkweek kan dit moeilik wees om die krag te vind om aan die predikingswerk deel te neem. Maar as ons gereeld daaraan deelneem, sal ons vind dat die Christelike bediening ons geestelik verkwik.—Joh. 4:32-34.
3. Hoe kan ons Jesus se bereidwilligheid om ander te leer, navolg?
3 By ’n ander geleentheid was Jesus en sy dissipels op pad na ’n eensame plek om ’n bietjie te rus. Maar ’n groot skare het daarvan te hore gekom en voor hulle uit daarheen gehardloop om hulle in te wag. Jesus het nie geïrriteerd hieroor geraak nie, maar hy is eerder “ontroer deur innige jammerte vir hulle” en “het hulle baie dinge begin leer” (Mark. 6:30-34). ’n Soortgelyke gesindheid is nodig om Bybelstudies te begin en te hou. Dit vereis volgehoue inspanning en opregte liefde vir mense. Moenie ophou om ’n Bybelstudie te probeer vind as jy nie op die oomblik een het nie.
4. Hoe kan hulppionierdiens ons help om Christus se geestesgesindheid na te volg?
4 Stel geestelike belange eerste: Hulppionierdiens kan ons help om ons meer op geestelike bedrywighede toe te spits. Een jong suster het geskryf: “Die ma van een van my vriendinne het ons albei aangespoor om ’n maand saam met haar hulppionierdiens te doen. Ek is regtig bly dat ons dit gedoen het. Ek het dit geniet om die broers en susters beter te leer ken, en hulle het kort voor lank soos my familie gevoel. Ek het dit ook geniet om meer geleenthede te hê om met ander oor Jehovah te praat en hulle wonderlike Koninkrykswaarhede te leer. Dit alles het my nader aan Jehovah en sy organisasie laat voel.”—Ps. 34:8.
5. Waarom moet ons ons voortdurend inspan om Jesus se geestesgesindheid na te volg?
5 Ons almal het ’n stryd tussen ons onvolmaakte vlees en ons begeerte om Jehovah te behaag (Rom. 7:21-23). Ons moet die gemaksugtige gesindheid van die wêreld weerstaan (Matt. 16:22, 23). Jehovah kan ons deur middel van sy heilige gees help om hierin te slaag (Gal. 5:16, 17). Laat ons, terwyl ons op ons redding tot in God se regverdige nuwe wêreld wag, Jesus se geestesgesindheid navolg deur Koninkryksbelange en die belange van ander voor ons eie te stel.—Matt. 6:33; Rom. 15:1-3.