Openbaar die pioniergees
1. Hoe sal jy die pioniergees beskryf?
1 Alle Koninkryksverkondigers kan die pioniergees openbaar, of hulle tans as pioniers kan dien of nie. Hulle neem die opdrag om te preek en dissipels te maak, baie ernstig op (Matt. 28:19, 20; Hand. 18:5). Hulle gee om vir mense en maak opofferinge om hulle bediening uit te voer (Matt. 9:36; Hand. 20:24). Jehovah se knegte is bereid om te doen wat nodig is om ander die waarheid te leer (1 Kor. 9:19-23). Kom ons kyk na die voorbeeld van iemand wat so ’n gees aan die dag gelê het, naamlik Filippus die evangeliedienaar.
2. Hoe kan ouer manne en bedieningsknegte Filippus se ywer vir die bediening navolg?
2 In die predikings- en onderrigtingswerk: Filippus het na groot verantwoordelikhede in die eerste-eeuse gemeente omgesien (Hand. 6:1-6). Maar hy was allereers ’n ywerige verkondiger van die goeie nuus (Hand. 8:40). Net so kan ouer manne en bedieningsknegte vandag, terwyl hulle na hulle toegewese pligte omsien, die pioniergees openbaar deur geesdriftig die leiding in die bediening te neem. Hoe versterk dit tog nie die gees van die gemeente nie!—Rom. 12:11.
3. Hoe kan ons die pioniergees openbaar wanneer ons beproewinge verduur?
3 Ná Stefanus se dood het ’n vlaag van vervolging die lewens van die dissipels baie ontwrig. Maar Filippus het aangehou om te preek, en hy het gehelp om die werk onder die Samaritane te begin (Hand. 8:1, 4-6, 12, 14-17). Ons kan sy voorbeeld navolg deur aan te hou om die goeie nuus bekend te maak wanneer ons beproewinge verduur en deur op onpartydige wyse vir almal wat ons teëkom, te getuig.—Joh. 4:9.
4. Watter voorbeeld het Filippus as ’n onderrigter gestel?
4 Filippus se bekwaamheid as ’n onderrigter van God se Woord kan gesien word in die verslag van die bekering van die Etiopiese eunug (Hand. 8:26-38). Om die vermoë te ontwikkel om die Bybel te gebruik en ‘uit die Skrif te redeneer’, is nog ’n manier waarop ons die pioniergees openbaar (Hand. 17:2, 3). Soos Filippus probeer ons die goeie nuus bekend maak oral waar mense gevind kan word en by elke gepaste geleentheid.
5. Wat kan Christenouers help om die pioniergees in hulle kinders te laat posvat?
5 In die gesin en die gemeente: Filippus se gesindheid en voorbeeld het ongetwyfeld ’n positiewe uitwerking op sy dogters gehad (Hand. 21:9). Christenouers wat Koninkryksbelange die middelpunt van hulle lewe maak, spoor eweneens hulle kinders aan om dieselfde te doen. ’n Ouer wat ywerig vir ander getuig, al is hy moeg ná ’n besige week, kan ’n blywende indruk op die hart van ’n kind maak.—Spr. 22:6.
6. Hoe kan ons toon dat ons die pioniers in ons gemeente waardeer?
6 Filippus het gasvryheid bewys aan Paulus en Lukas, ywerige Christene wat hulle ingespan het in Jehovah se diens (Hand. 21:8, 10). Hoe kan ons vandag toon dat ons ywerige broers en susters waardeer en ondersteun? Miskien kan ons op dae wanneer min mense in velddiens uitgaan, aanbied om ’n oggend of ’n middag saam met die pioniers te werk (Fil. 2:4). Ons kan hulle ook na ons huis nooi vir opbouende omgang. Wat ons omstandighede ook al is, mag ons almal daarna streef om die pioniergees te openbaar.