Help julle kinders om vooruitgang in die bediening te maak
1 Christenouers het die ernstige verantwoordelikheid om hulle kinders van jongs af in die bediening op te lei. Dit kan op verskillende maniere gedoen word. Sommige kinders kan ’n gepaste Bybelteks aanhaal selfs voordat hulle kan lees. Dit kan ’n kragtige uitwerking hê op mense wat na hulle luister. Wanneer kinders ouer word, kan hulle selfs meer in die bediening doen. Hoe kan julle as ouers julle kinders help om ook ’n getuienis te gee? Miskien sal julle die volgende wenke nuttig vind.
2 Nadat julle gegroet het, kan jy sê:
◼ “My seun, [sy naam], wil graag vir jou ’n betekenisvolle vers wys.” Jou kind kan sê: “Hierdie vers in Psalm het my God se naam geleer. [Kind lees of haal Psalm 83:18 aan.] Hierdie tydskrifte praat oor wat Jehovah God vir ons gaan doen. Kan ek dit by u laat?” Jy kan die gesprek afsluit deur te verduidelik hoe die wêreldwye werk ondersteun word.
3 Of jy kan hierdie benadering probeer:
◼ “Hallo. Ek is besig om my dogter, [haar naam], op te lei om besorgdheid teenoor mense in die gemeenskap te betoon. Sy het ’n kort Bybelboodskap wat sy graag aan jou wil oordra.” Sy kan sê: “Ek hou daarvan om mense te help deur hulle van die Bybel se hoop vir die toekoms te vertel. [Kind lees of haal Openbaring 21:4 aan.] Hierdie tydskrif verduidelik wat God se Koninkryk vir ons gaan doen. Ek dink u sal dit geniet om dit te lees.”
4 As kinders altyd ’n vereenvoudigde aanbieding gebruik, bou hulle vertroue op in hulle vermoë om die Koninkryksboodskap bekend te maak. Oefensessies wat hulle help om duidelik en hard genoeg te praat, sal dit vir hulle moontlik maak om onder verskillende omstandighede met mense te praat. Goeie voorbereiding en opregte lof sal kinders help om aan hulle geloof uiting te gee.
5 Met sulke aansporing het baie kinders al aan die vereistes voldoen om ongedoopte verkondigers te word. Wat ’n vreugde is dit tog om te sien hoe ons kinders vooruitgang in die Christelike bediening maak!—Ps. 148:12, 13.