Onderrigting wat tot die lewe lei
1 Hoe lonend is dit tog om te sien hoe mense se oë verhelder wanneer hulle die waarheid uit God se Woord begin verstaan! Dit is waarlik bevredigend om ander te vertel van die kennis van God en sy voorneme vir die mens. Sulke onderrigting kan iemand tot die ewige lewe lei.—Joh. 17:3.
2 Waarom dit beter is: Vandag word onderrigting op amper elke moontlike manier en oor elke denkbare onderwerp aangebied (Pred. 12:12). Maar sulke kennis kan nie met “die luisterryke dinge van God” vergelyk word nie (Hand. 2:11). Het die onderrigting wat die wêreld aanbied, die mensdom nader aan die Skepper gebring en mense van sy voornemens geleer? Het dit mense gehelp om te verstaan wat gebeur wanneer ons sterf of waarom daar soveel lyding is? Het dit mense hoop gegee? Het dit die gesinslewe help verbeter? Nee. Ons kan slegs deur middel van goddelike onderrigting bevredigende antwoorde op die lewe se belangrikste vrae vind.
3 Goddelike onderrigting bied iets waaraan daar in vandag se wêreld ’n ernstige tekort is—sedelike ontwikkeling. God se Woord verwyder rassisme, stamtrots en nasionalisme heeltemal uit die harte van diegene wat die leringe daarin aanvaar en toepas (Heb. 4:12). Dit het mense beweeg om elke soort geweld te laat vaar en hulle ‘met die nuwe persoonlikheid te beklee’ (Kol. 3:9-11; Miga 4:1-3). Wat meer is, goddelike onderrigting het vir miljoene mense die krag gegee om diepgewortelde gebruike en eienskappe wat God mishaag, te oorkom.—1 Kor. 6:9-11.
4 Waarom dit nou dringend is: Ons Grootse Onderrigter maak ons bewus van die betekenis van die tye waarin ons lewe. Sy profetiese oordele bevat akkurate inligting oor ons tyd wat oor die hele aarde verkondig moet word (Op. 14:6, 7). Christus regeer in die hemel, die wêreldryk van valse godsdiens sal binnekort verwoes word en God se Koninkryk is gereed om alle aardse regerings te vernietig (Dan. 2:44; Op. 11:15; 17:16). Daarom is dit dringend dat mense God se tans heersende Koning erken, uit Babilon die Grote uitgaan en die naam van Jehovah in geloof aanroep (Ps. 2:11, 12; Rom. 10:13; Op. 18:4). Mag ons soveel as moontlik doen om die onderrigting wat tot die lewe lei, aan ander oor te dra.