Kweek goeie gewoontes aan en ontvang ryk seëninge
1. Waarom is dit nuttig om jou geestelike roetine te ondersoek?
1 Toe jy ’n Christen geword het, het jy jou heel moontlik ingespan om ’n goeie roetine van geestelike bedrywighede uit te werk wat Bybelstudie, Christelike vergaderinge, velddiens en gebed insluit. Danksy Jehovah se seën op jou pogings het jy geestelik gegroei. Dalk het ’n aantal jare nou al verbygegaan vandat jy gedoop is. Bly jy nog by die goeie geestelike gewoontes wat jy ontwikkel het toe jy ’n Christen geword het?
2. Hoe vind ons baat by daaglikse Bybellees?
2 Ondersoek jou roetine: Het jy die gewoonte om elke dag ’n deel van God se Woord te lees? Watter ryk seëninge ontvang ons tog as ons dit doen! (Jos. 1:8; Ps. 1:2, 3). In eertydse Israel moes elke koning “al die dae van sy lewe” in sy afskrif van die Wet lees. Watter voordele het dit ingehou? Hy sou ’n nederige hart ontwikkel en leer om Jehovah te vrees, sodat hy nie van Sy gebooie sou afwyk nie (Deut. 17:18-20). Net so help daaglikse Bybellees ons vandag om onberispelik en onskuldig te bly te midde van hierdie goddelose, verdorwe wêreld. Dit help ons ook om ten volle toegerus te wees vir die bediening.—Fil. 2:15; 2 Tim. 3:17.
3. Watter seëninge ontvang ons as ons vergaderinge gereeld bywoon?
3 Jesus het die gewoonte gehad om na die sinagoge toe te gaan, waar die Skrif bespreek is (Luk. 4:16). Dit het hom ongetwyfeld versterk om die beproewinge te verduur waarvoor hy te staan sou kom. Ons word ook versterk deur die geestelike onderrigting wat ons by gemeentelike vergaderinge ontvang en die heilsame “wedersydse aanmoediging” wat ons daar geniet (Rom. 1:12). Wanneer ons saam met ons broers vergader, help dit ons om die probleme van hierdie laaste dae te verduur (Heb. 10:24, 25). Is dit nog steeds jou gewoonte om al die vergaderinge by te woon?
4. Hoe vind ons daarby baat as ons elke week aan die velddiens deelneem?
4 Die geïnspireerde verslag sê vir ons dat die apostels die goeie nuus “elke dag in die tempel en van huis tot huis” bekend gemaak het (Hand. 5:42). Ons kan dalk nie elke dag getuig nie. Maar kan ons dit ons gewoonte maak om elke week aan die een of ander aspek van die bediening deel te neem? Deur dit te doen, sal ons sekerlik meer bedrewe daarin word om God se Woord te hanteer en sal ons heel moontlik aanmoedigende ondervindinge geniet terwyl ons Bybelwaarheid aan ander verkondig.
5. Waarom is dit noodsaaklik om gereeld tot Jehovah te bid?
5 Die profeet Daniël is ryklik geseën omdat hy Jehovah sy hele lewe lank “met standvastigheid” gedien het. Dit het sy gewoonte ingesluit om gereeld tot Jehovah te bid (Dan. 6:10, 16, 20). Net so sal Jehovah ons met sy heilige gees seën as ons hom gereeld in hartgrondige gebed nader (Luk. 11:9-13). Wat meer is, Jehovah sal op sy beurt nader aan ons kom en sal ons toelaat om ’n intieme verhouding met hom te geniet (Ps. 25:14; Jak. 4:8). Wat ’n wonderlike beloning! Laat ons dus ywerig daaraan werk om goeie geestelike gewoontes te handhaaf en ryk seëninge van Jehovah ontvang.