Toon persoonlike belangstelling—Deur onpartydig te getuig
1 In ’n visioen het die apostel Johannes ’n engel in die middel van die hemel sien vlieg wat ewige goeie nuus aan mense van “elke nasie en stam en taal en volk” bekend maak (Op. 14:6). Volg ons die engel se voorbeeld na deur onpartydig te getuig? Sonder dat ons dit besef, het ons dalk beskouings wat partydig of bevooroordeeld is. Ons gesindheid teenoor die mense wat ons ontmoet, kan die manier beïnvloed waarop ons die goeie nuus vir hulle aanbied. Ons moet dus opregte liefdevolle besorgdheid toon wanneer ons vir mense van ’n ander agtergrond getuig.
2 Dink aan julle gebied: Is daar immigrante of vlugtelinge wat in julle gebied woon? Hulle kan maklik oor die hoof gesien word. Neem die inisiatief om hulle te soek, en probeer hulle beter leer ken. Wat is hulle behoeftes en bekommernisse, hulle voorkeure en afkeure, hulle vrese en vooroordele? Probeer jou aanbieding van die Koninkryksboodskap dienooreenkomstig aanpas (1 Kor. 9:19-23). Soos die apostel Paulus, moet ons verplig voel om die goeie nuus aan almal in ons gebied te verkondig, insluitende diegene wat van ’n ander land kom, van ’n ander kultuur is, ’n ander taal praat en diegene wat baie ryk is.—Rom. 1:14, voetnoot in naslaanuitgawe.
3 Maar hoe kan jy vir iemand getuig wat ’n ander taal praat? Maak goeie gebruik van die boekie Good News for People of All Nations. Jy kan ook ’n paar traktate of brosjures saam met jou dra in die tale wat algemeen in jou gebied gepraat word. (Sien Ons Koninkryksbediening vir Julie 2003, bl. 4, par. 2-3.) Daarbenewens het party verkondigers ’n poging aangewend om te leer hoe om in ander tale te groet en ’n eenvoudige aanbieding te doen. Mense is dikwels beïndruk wanneer iemand in hulle taal met hulle probeer praat, al is dit nie vlot nie, en dit kan hulle na die goeie nuus aantrek.
4 Volg Jehovah na: Deur mense van verskillende agtergronde te probeer bereik, volg ons ons onpartydige God, Jehovah, na, “wie se wil dit is dat alle soorte mense gered moet word en tot juiste kennis van die waarheid moet kom”.—1 Tim. 2:3, 4.