Branch Letter

Liewe Koninkryksverkondigers

Die heel eerste spesiale byeenkomsdag in gebaretaal is op Sondag 23 April 2006 in die Koninkryksaal by Bethel gehou. Dowe verkondigers en belangstellendes asook dié wat gebaretaal aangeleer het, het van regoor Suid-Afrika sowel as van Mosambiek, Namibië en Swaziland gekom om hierdie onvergeetlike gebeurtenis te ondersteun. Almal was baie bly om saam met hulle broers te kon wees wat van soveel verskillende plekke af gekom het.

Gedurende die oggendsessie was daar 626 mense teenwoordig. Goeie vooruitgang word gemaak in die dowe veld, en daar is tans 3 gebaretaalgemeentes en meer as 40 groepe onder die toesig van die Suid-Afrikaanse takkantoor.

Ons het goeie verslae ontvang aangaande die liefdevolle ondersteuning wat aan duisende broers en susters verleen is nadat orkane in 2005 die Golfkus van die Verenigde State verwoes het.—Joh. 13:35.

Meer as 8 000 broers en susters wat saam met 60 verskillende Streekboukomitees gewerk het, het hulle tyd, vaardighede en middele in die noodlenigingspoging gebruik. Hulle het gehelp om 86 Koninkryksale en 4 178 huise te herstel of te herbou. Daar moet nog aan ’n verdere 5 Koninkryksale en 722 huise gewerk word. Vrywilligers het van regoor die Verenigde State gekom om te help. Hoe dankbaar is ons almal tog vir hulle liefdeswerk!—1 Tess. 5:18.

Hou asseblief aan om te bid vir al hierdie dierbare broers—diegene wat daardeur geraak is, asook dié wat met die noodleniging help.—2 Kor. 1:11.

Julle broers

Suid-Afrikaanse takkantoor