Spesiale kampanje vanaf 16 Oktober–12 November!
1 “Die einde van valse godsdiens is op hande!” Dit is die titel van Koninkryksnuus Nr. 37, wat vanaf volgende maand regoor die wêreld versprei gaan word. Gedurende die eerste helfte van Oktober sal ons Die Wagtoring en Ontwaak! aanbied. Vanaf Maandag 16 Oktober tot Sondag 12 November sal ons aan ’n intensiewe verspreiding van Koninkryksnuus Nr. 37 deelneem. Oor die naweke van die kampanje sal ons dit saam met die jongste tydskrifte aanbied.
2 Wie hieraan kan deelneem: Alle bedrywige verkondigers van die goeie nuus sal ten volle hieraan wil deelneem. Party sal hulppionierdiens kan doen. Het jy kinders of Bybelstudente wat geestelik vooruitgang maak? Help hulle om die ouer manne te nader om te sien of hulle as ongedoopte verkondigers kwalifiseer. Ouer manne moet die inisiatief neem om met onbedrywige verkondigers te praat en hulle aan te moedig om deel te neem, dalk deur saam met ervare verkondigers te werk.
3 ’n Voorraad van Koninkryksnuus Nr. 37 word aan alle gemeentes gestuur sodat verkondigers en pioniers ten minste 50 eksemplare kan kry. Belangstellendes wat nog nie verkondigers is nie, kan elkeen vyf eksemplare ontvang om aan gesinslede en vriende te gee. Almal moet rekord hou van hoeveel traktate hulle by mense gelaat het en dit op die agterkant van hulle velddiensrapporte vir Oktober en November skryf. Die sekretaris sal die totaal vir die gemeente uitwerk en dit aan die einde van elke maand na die takkantoor stuur. Eksemplare van die Koninkryksnuus wat oorbly nadat die kampanje verby is, kan in enige aspek van die bediening gebruik word.
4 Wat om te sê: Hou jou aanbieding kort, want dan sal meer mense met die boodskap bereik kan word. Jy kan sê: “Ek neem deel aan die wêreldwye verspreiding van hierdie belangrike boodskap as ’n diens aan die publiek. Hier is jou gratis eksemplaar. Lees dit asseblief.” Dit sal dalk help om nie met ’n velddienssak na die deure te gaan nie. Maak seker dat jy ’n rekord van alle belangstelling hou.
5 Hoe om julle gebied te dek: Eerder as om die Koninkryksnuus in straatwerk te versprei, moet julle probeer om soveel moontlik van julle huis-tot-huis- en sakegebied te dek. Gemeentes word aangemoedig om hulle werk in die ontoegekende gebied teen 15 Oktober af te handel sodat hulle vanaf 16 Oktober hulle volle aandag aan hulle plaaslike gebied kan gee. Die traktaat moenie in die ontoegekende gebied versprei word nie. Hou rekord van die huise waar niemand tuis was nie, en probeer om op ’n ander tyd of dag van die week terug te gaan. Vanaf Maandag 6 November kan ’n eksemplaar gelaat word by huise waar niemand tuis was nie. Maar indien die gemeente meer gebied het as wat gedurende die toegewese tyd gedek kan word, kan die ouer manne besluit dat die Koninkryksnuus gedurende die hele kampanje by huise gelaat kan word waar niemand tuis is nie.
6 Die vernietiging van “Babilon die Grote” kom vinnig nader. Mense moet uit haar uitkom voordat sy heeltemal vernietig word (Op. 14:8; 18:8). Tref nou reëlings om ’n volle aandeel te hê aan hierdie wêreldwye kampanje om almal in kennis te stel dat die einde van valse godsdiens op hande is!