“Gelukkig is die mens wat beproewing bly verduur”
1 Alle Christene sal voor beproewinge te staan kom (2 Tim. 3:12). Ons het dalk te kampe met beproewinge soos slegte gesondheid, ekonomiese ontberinge, versoeking, vervolging of baie ander dinge. Beproewinge wat Satan oor ons bring, is bedoel om ons traag te laat word, om ons ons Christelike bediening te laat verwaarloos of selfs om ons te laat ophou om God te dien (Job 1:9-11). Hoe lei dit tot geluk as ons beproewinge verduur?—2 Pet. 2:9.
2 Berei voor vir beproewinge: Jehovah het sy Woord van waarheid voorsien, wat ’n verslag van Jesus se lewe en leringe insluit. Deur Jesus se woorde te hoor en in ooreenstemming daarmee op te tree, lê ons ’n stewige fondament en berei ons sodoende voor vir teëspoed (Luk. 6:47-49). Ons put ook krag uit ander voorsienings—ons Christenbroers, gemeentelike vergaderinge en Bybelpublikasies wat van “die getroue en verstandige slaaf”-klas af kom. Ons maak mildelik gebruik van God se gawe van gebed.—Matt. 6:13.
3 Jehovah het ons ook ’n hoop gegee. Wanneer ons sterk geloof in Jehovah se beloftes opbou, word ons hoop “’n anker vir die siel, seker sowel as vas” (Heb. 6:19). In Bybeltye het skepe nooit sonder ’n anker uit die hawe gevaar nie, nie eers wanneer dit mooiweer was nie. As ’n storm skielik opgesteek het, kon die anker laat sak word, sodat die skip nie op die rotse loop nie. Net so sal ons, as ons nou geloof in God se beloftes opbou, bestendig wees wanneer ons stormagtige tye beleef. Probleme kan baie skielik ontstaan. Hoewel die predikingsbedrywighede van Paulus en Barnabas aanvanklik ’n goeie ontvangs in Listra gekry het, het die situasie vinnig verander toe Joodse teenstanders daar aangekom het.—Hand. 14:8-19.
4 Volharding lei tot geluk: As ons ondanks teenstand in die bediening volhard, gee dit ons gemoedsrus. Ons is bly wanneer ons waardig geag word om ter wille van Christus oneer te ly (Hand. 5:40, 41). Wanneer ons beproewinge verduur, help dit ons om nederigheid, gehoorsaamheid en volharding in voller mate aan te kweek (Deut. 8:16; Heb. 5:8; Jak. 1:2, 3). Dit leer ons om op Jehovah en op sy beloftes te vertrou en om ons toevlug tot hom te neem.—Spr. 18:10.
5 Ons weet dat beproewinge tydelik is (2 Kor. 4:17, 18). Beproewinge bied ons geleenthede om te toon hoe innig ons liefde vir Jehovah is. Deur dit te verduur, kan ons ’n antwoord op Satan se aantygings voorsien. Ons gee dus nie moed op nie! “Gelukkig is die mens wat beproewing bly verduur, want wanneer hy goedgekeur is, sal hy die kroon van die lewe ontvang.”—Jak. 1:12.