Ons streef daarna om meer in ons bediening te doen
1 Die apostel Paulus het Christene vermaan om in God se weg te wandel en aan te hou “om dit in voller mate te doen” (1 Tess. 4:1). Wat vereis dit van ons? Ons moet onder andere voortdurend na maniere soek om ons geestelike bedrywighede uit te brei en moet altyd daarna streef om ‘ons bediening ten volle uit te voer’.—2 Tim. 4:5.
2 Beweegrede: Ons streef daarna om meer in ons bediening te doen omdat ons ons Skepper graag in voller mate wil dien. Ons wil geestelik groei en na maniere soek om ons bediening te verbeter. ’n Goeie roetine en die regte beweegrede sal ons help om teokratiese doelwitte te bereik.—Ps. 1:1, 2; Fil. 4:6; Heb. 10:24, 25.
3 As ons ons bediening wil uitbrei, moet ons ’n mededeelsame, selfopofferende gees aankweek. So ’n gees kan aangekweek word deur biddend te peins oor Jesus se goeie voorbeeld (Matt. 20:28). Jesus het gedurende sy bediening groot vreugde daaruit geput om ander te dien (Hand. 20:35). Ons kan Jesus navolg deur persoonlike belangstelling in mense te toon en op die uitkyk te wees na geleenthede om meer in ons bediening te doen.—Jes. 6:8.
4 Ouers se rol: ’n Begeerte om ander te dien en ons bediening uit te brei, kan op ’n vroeë ouderdom by kinders ingeboesem word. Jongmense sal sien hoe ywerig ander lede van die gesin is en hoe hulle hulle inspan om hulle bediening uit te brei. ’n Broer is as ’n jong seun beweeg om meer te doen omdat hy saam met sy oupa aan teokratiese bedrywighede deelgeneem het. Sy oupa se ywer en vreugde het hom beweeg om na geleenthede te soek om sy broers te dien. Hy is nou ’n bedieningskneg.
5 Broers is nodig: “As ’n man na ’n opsienersamp streef, begeer hy ’n voortreflike werk” (1 Tim. 3:1). Hierdie woorde spoor broers aan om daarna te streef om aan die vereistes te voldoen vir verdere diensvoorregte in Jehovah se organisasie. Dit verg nie spesiale vaardighede of uitsonderlike natuurlike vermoëns nie. ’n Broer wat na ’n opsienersamp streef, sal eers die Koninkryk soek en sal ywerig aan die bediening deelneem (Matt. 6:33; 2 Tim. 4:5). Hy sal ’n goeie voorbeeld vir ander probeer stel.
6 Wêreldwyd: Jehovah bespoedig die insameling (Jes. 60:22). Dit is noodsaaklik dat almal wat Jesus se voorbeeld volg, meer in hulle bediening probeer doen. Volgens die wêreldwye rapport vir die 2006-diensjaar is 248 327 gedoop. Dit verteenwoordig gemiddeld meer as 680 nuwelinge per dag! Mag ons almal aanhou soek na maniere om meer in ons bediening te doen.