Spesiale uitgawe van die Ontwaak! sal in November aangebied word!
1 Baie mense het opregte vrae oor die waarde van die Bybel. Hoe kan dit God se Woord genoem word as mense dit geskryf het? Om watter redes kan ek daarop vertrou om my voetstappe te rig? Hoe sal ek vir my tyd en inspanning beloon word as ek die Bybel lees en bestudeer? Watter Bybelvertaling moet ek gebruik? Dit is party van die vrae wat beantwoord word in die spesiale uitgawe van die Ontwaak! vir November, met die titel “Die Bybel—Kan jy dit vertrou?”
2 Ons moet hierdie spesiale uitgawe van die Ontwaak! by soveel mense moontlik in ons gebied laat. Neem elke Saterdag in November saam met die gemeente aan die huis-tot-huis-bediening deel, as dit moontlik is. Wys hierdie nommer van die Ontwaak! vir jou familielede, bure, werksmaats, onderwysers, skoolmaats en herbesoeke. Neem eksemplare saam wanneer jy inkopies doen en reis. Die takkantoor stuur bykomende eksemplare sodat die gemeente genoeg sal hê.
3 Begin ’n Bybelstudie: As jy die tydskrif by iemand laat, kan jy die grondslag vir ’n Bybelstudie lê voordat jy die gesprek afsluit. Jy kan byvoorbeeld sê: “Volgende keer wil ek graag vir jou wys wat die Bybel se antwoord is op die vraag ‘Wat is God se voorneme met die aarde?’” Gaan dan terug met die Leer Bybel-boek en wys vir die huisbewoner bladsye 4-5, of bespreek paragrawe 1-3 van hoofstuk 3. ’n Ander opsie is om te sê: “Volgende keer wil ek graag ’n Bybelprofesie bespreek wat in ons dag vervul word.” Wanneer jy teruggaan, kan jy vir die huisbewoner hoofstuk 9 van die boek wys en paragrawe 1-3 met hom bespreek. Of jy kan eenvoudig vir die huisbewoner sê: “Baie mense vind dit moeilik om te verstaan wat hulle in die Bybel lees. Volgende keer wil ek graag vir jou wys hoe jy jou Bybel beter kan verstaan.” Bied die Leer Bybel-boek tydens die herbesoek aan en demonstreer ’n studie.
4 Net die Bybel bevat “heilige geskrifte”, wat ons “wys kan maak tot redding” (2 Tim. 3:15). Almal van ons moet dus ywerig deelneem aan die verspreiding van hierdie spesiale uitgawe van die Ontwaak! om mense te help om vertroue in die Bybel op te bou!