Bied hoop aan die armes
1 Jesus het spesiale belangstelling in die armes getoon. Hy het soms wonderdadig materiële hulp voorsien en die siekes genees, maar hy het hom daarop toegespits om die “goeie nuus” aan die armes te verkondig (Matt. 11:5). Vandag bevoordeel die Christelike bediening nog steeds die armes sowel as ander.—Matt. 24:14; 28:19, 20.
2 Ware hoop: Die Christendom se bedienaars belowe dikwels dat die armes voorspoedig sal wees as hulle ruimhartig aan die kerk gee. Maar die Bybel leer dat slegs God se Koninkryk ’n einde aan armoede sal maak en al die probleme van die mensdom sal oplos (Ps. 9:18; 145:16; Jes. 65:21-23). Deur die armes te wys wat die Bybel werklik leer, gee ons hulle hoop en help ons hulle om in hulle geestelike behoefte te voorsien.—Matt. 5:3.
3 Die Fariseërs van Jesus se dag het neergesien op die armes en hulle minagtend ‛am-ha·’aʹrets, of “mense van die aarde”, genoem. Maar Jesus het “hulle bloed”, of hulle lewe, as “kosbaar” beskou (Ps. 72:13, 14). Ons kan Jesus navolg en aan sulke armes “guns betoon” deur goedhartig en medelydend te wees (Spr. 14:31). Ons wil nooit neerhalend praat oor mense wat in ’n arm buurt woon of huiwerig wees om vir hulle te getuig nie. Baie wat op die Koninkryksboodskap reageer, is arm.
4 Help nou: Wanneer ons Bybelbeginsels aan armes in ons gebied leer, help dit hulle ook om nou reeds die gevolge van armoede te verlig. Die Bybel veroordeel byvoorbeeld dronkenskap, dobbelary, luiheid, tabakgebruik en ander gebruike wat tot armoede bydra (Spr. 6:10, 11; 23:21; 2 Kor. 7:1; Ef. 5:5). Die Skrif spoor mense aan om eerlik en hardwerkend te wees, eienskappe waarna werkgewers op die uitkyk is (Kol. 3:22, 23; Heb. 13:18). Trouens, in een opname het die meeste werkgewers eerlikheid en opregtheid beskou as eienskappe wat hulle die meeste beïndruk in mense wat werk soek.
5 Jehovah is nie ongevoelig vir die lyding van die armes nie. Jesus Christus sal binnekort “die arme verlos wat om hulp roep” (Ps. 72:12). Tot dan toe het ons die voorreg om ander, insluitende die armes, met die Bybel se boodskap van hoop te vertroos.