Nuwe program vir die spesiale byeenkomsdag

Die tema van die program vir die spesiale byeenkomsdag vir die 2009-diensjaar is “Let voortdurend op die bediening . . . , dat jy dit vervul”, wat gebaseer is op Kolossense 4:17. As Christene neem ons hierdie vermaning ernstig op. Ons doelwit is om ons bediening getrou te vervul, soos Jesus gedoen het (Joh. 17:4). Die apostel Paulus het ook vir ons ’n uitstekende voorbeeld in hierdie opsig gestel. Hy was vasbeslote om sy loopbaan in die bediening te volbring.—Hand. 20:24.

Die kringopsiener se deel sal toon hoe verskeie verkondigers uitdagings in hulle bediening suksesvol die hoof bied. Dan sal die toespraak “Kweek wat jy geplant het” die aandag vestig op hoe ons diegene wat “die regte gesindheid vir die ewige lewe” het, werklik kan help (Hand. 13:48). Die besoekende spreker sal in sy eerste toespraak, “Hoe ons ons as bedienaars aanbeveel”, ’n vers-vir-vers-bespreking van 2 Korintiërs 6:1-10 hou. Tydens die middagsessie sal hy die gehoor toespreek oor die tema “Beskou jou bediening as uiters kosbaar”. Jy sal ongetwyfeld aangemoedig word deur die dele “Jonk en oud geniet die bediening” en “Jongmense wat die bediening vervul”. Diegene wat by die komende byeenkomste hulle toewyding deur middel van waterdoop wil simboliseer, moet die presiderende opsiener so gou moontlik in kennis stel. ’n Belangrike deel van al ons byeenkomste is die bespreking van Die Wagtoring. Bring jou eksemplaar van Die Wagtoring saam wat tydens die week van die spesiale byeenkomsdag bestudeer sal word.

Omdat ons ons bediening wil vervul, probeer ons seker maak dat ander belange en bedrywighede nie oorskadu wat Jehovah aan ons toevertrou het nie. Die skriftuurlike aanmoediging wat deur middel van die spesiale byeenkomsdagprogram voorsien word, moet ons almal help om te besef wat ons moet doen om die regte fokus te behou en ons bediening in oënskou te neem sodat ons dit ten volle kan uitvoer.