Vraebus

◼ Wat moet ’n paartjie met die ouer manne bespreek indien hulle die Koninkryksaal vir hulle troue wil gebruik?

Troues wat in ooreenstemming met Bybelbeginsels gereël word, strek Jehovah tot eer. Dit is veral waar in verband met troues wat by die Koninkryksaal plaasvind, aangesien die gemeenskap programme wat daar gehou word, as ’n weerspieëling van ons organisasie beskou. Dit is gepas vir die plaaslike ouer manne om betrokke te wees wanneer die Koninkryksaal aangevra word vir ’n troue, sodat “alles welvoeglik en volgens reëling [kan] geskied”.—1 Kor. 14:40.

’n Paartjie wat die Koninkryksaal vir hulle troue wil gebruik, moet ’n geskrewe aansoek indien by die dienskomitee van ’n gemeente wat by daardie saal vergader. Hulle brief moet lank voor die tyd ingedien word en moet aandui wanneer en hoe laat hulle die saal wil gebruik. Hulle moet in gedagte hou dat die ouer manne nie vergaderingtye ter wille van ’n troue sal aanpas nie. Daarbenewens moet die bruid en bruidegom ’n goeie reputasie hê en in ooreenstemming met Bybelbeginsels en Jehovah se regverdige standaarde lewe.

Om seker te maak dat die troue ons waardige God tot eer strek, moet die paartjie die reëlings vir die troue met die dienskomitee bespreek voordat dit gefinaliseer word. Hoewel die ouer manne nie hulle persoonlike voorkeure op die paartjie sal probeer afdwing nie, sal aanpassings gemaak moet word indien enigiets onaanvaarbaar beplan word. Net musiek wat uit Kingdom Melodies geneem is of wat in ons liedereboek voorkom, mag gebruik word. As die Koninkryksaal op enige manier versier gaan word of die stoele herrangskik gaan word, sal hulle dit ook moet goedkeur. Indien foto’s geneem of ’n video-opname gemaak gaan word, moet dit nie afbreuk doen aan die waardigheid van die geleentheid nie. Die ouer manne sal moontlik toelaat dat ’n oefensessie by die Koninkryksaal gehou word solank dit nie met ander gemeentelike reëlings inmeng nie. Geen uitnodigings moet op die kennisgewingbord geplaas word nie. Die ouer manne kan egter ’n kort aankondiging tydens die Diensvergadering laat maak om die gemeente in te lig omtrent die komende troue by die Koninkryksaal.

Hoewel nie almal in die trougeselskap gedoop hoef te wees nie, sal dit nie gepas wees om iemand by die trougeselskap in te sluit wie se lewenswyse lynreg in stryd is met Bybelbeginsels of wie se gedrag vrae sal laat opkom by dié wat teenwoordig is nie. Die troutoespraak moet deur ’n aangestelde ouer man gehou word, indien een beskikbaar is. Ouer manne is bekwame onderrigters van God se Woord, en hulle is dus in die beste posisie om die skriftuurlike beginsels te bespreek wat by hierdie belangrike geleentheid van toepassing is.—1 Tim. 3:2.

Aangesien die troue die ouer man wat die huwelik sal voltrek, in ’n goeie of slegte lig kan stel, moet hy ook op hoogte gehou word van die troureëlings. Hy en die paartjie moet bymekaarkom sodat hy hulle kan vra oor hulle sedelike gedrag tydens hulle hofmakery, en hulle moet openhartig en eerlik met hom wees. As die bruid of bruidegom voorheen getroud was, moet hy of sy bewys dat hulle skriftuurlik en wetlik vry is om te trou (Matt. 19:9). Dit sal insluit dat ’n afskrif van die egskeidingsbevel aan die ouer man gewys word.

Wanneer die paartjie openlik met die ouer manne kommunikeer en hulle volle samewerking gee, sal die troue vir almal ’n vreugdevolle geleentheid wees.—Spr. 15:22; Heb. 13:17.