Wie is die Koning van God se Koninkryk?

• Hy sou deur God gekies word. “Ek het self my koning ingehuldig . . . Ek sal nasies as jou erfdeel gee, en die eindes van die aarde as jou besitting.” – Psalm 2:6, 8.

• Hy sou ’n erfgenaam van koning Dawid wees. “’n Kind is vir ons gebore, ’n seun is aan ons gegee . . . Sy heerskappy sal bly uitbrei, en daar sal geen einde aan vrede wees nie. Hy sal op die troon van Dawid sit en oor sy koninkryk regeer. Hy sal dit stewig vestig.” – Jesaja 9:6, 7. 

• Hy sou in Betlehem gebore word. “O Betlehem . . . uit jou sal daar vir my die een kom wat heerser . . . sal wees. . . . Sy grootheid [sal] tot aan die eindes van die aarde reik.” – Miga 5:2, 4.

• Hy sou deur mense verwerp en doodgemaak word. “Daar is op hom neergesien, en ons het hom as onbelangrik beskou. . . . Hy is vir ons oortreding deurboor. Weens ons sondes het hy verskriklik gely.” – Jesaja 53:3, 5.

• Hy sou uit die dood opgewek word en ’n belangrike posisie ontvang. “U sal my nie in die Graf los nie. U sal nie toelaat dat u lojale kneg in die graf bly nie. . . . Daar is geluk aan u regterhand, vir ewig.” – Psalm 16:10, 11.

Jesus Christus – Die perfekte Heerser

In die hele geskiedenis het net een persoon by die beskrywing van ’n perfekte Heerser gepas, en daardie persoon is Jesus Christus. Om die waarheid te sê, ’n engel het vir sy ma, Maria, gesê: “God sal hom die troon van sy vader Dawid gee, . . . en daar sal geen einde aan sy Koninkryk wees nie.” – Lukas 1:31-33.

Jesus was nooit ’n heerser op die aarde nie. Hy gaan eerder uit die hemel oor mense regeer as Koning van God se Koninkryk. Wat maak hom die perfekte Heerser? Kom ons kyk na wat Jesus gedoen het toe hy op die aarde was.

• Jesus het vir mense omgegee. Jesus het almal gehelp, mans en vrouens, jonk en oud, maak nie saak wat hulle agtergrond of status was nie (Matteus 9:36; Markus 10:16). Toe ’n melaatse man hom gesmeek het: “As u net wil, kan u my gesond maak”, het Jesus vir hom jammer gevoel en hom gesond gemaak. – Markus 1:40-42.

• Jesus het ons geleer hoe om God gelukkig te maak. Hy het gesê: “Julle kan nie slawe van God en van Rykdom wees nie.” Hy het ook gesê dat ons ander moet behandel soos ons behandel wil word – ’n reël wat die Goue Reël genoem word. En hy het gewys dat God nie net belangstel in wat ons doen nie, maar ook in hoe ons dink en voel. So as ons God gelukkig wil maak, moet ons ons diepste gevoelens beheer (Matteus 5:28; 6:24; 7:12). Jesus het gesê dat ons net regtig gelukkig kan wees as ons leer wat God wil hê ons moet doen en dit dan doen. – Lukas 11:28.

• Jesus het mense geleer om ander lief te hê. Jesus se woorde en dade was kragtig en het mense se harte geraak. “Die skare [was] verstom oor die manier waarop hy geleer het, want hy het hulle geleer soos iemand wat gesag het” (Matteus 7:28, 29). Hy het hulle geleer om hulle vyande lief te hê. Hy het selfs gebid vir party van die mense wat verantwoordelik was vir sy dood en gesê: “Vader, vergewe hulle, want hulle weet nie wat hulle doen nie.” – Matteus 5:44; Lukas 23:34.

Jesus is beslis gekwalifiseerd om ’n goeie, liefdevolle Wêreldheerser te wees wat ander wil help. Maar wanneer begin hy regeer?