Hoe sal hulle hoor?
1. Waarom kan die predikingswerk ’n uitdaging wees, en waarom volhard ons?
1 Aangesien Jehovah se dag vinnig nader kom, is dit noodsaaklik dat nog tallose mense gehelp word om juiste kennis van God en sy voorneme met die mens te verkry (Joh. 17:3; 2 Pet. 3:9, 10). Dit kan soms ’n uitdaging wees omdat baie mense nie belangstel nie of ons dalk oor ons predikingswerk spot (2 Pet. 3:3, 4). Ons het nietemin alle rede om te glo dat daar nog mense in ons gebied is wat die goeie nuus sal aanneem wanneer hulle dit hoor. Hoe sal hulle hoor sonder dat iemand preek?—Rom. 10:14, 15.
2. Hoe spoor die apostel Paulus se voorbeeld ons aan?
2 Bied teenstand die hoof: Ter wille van diegene wat gewillig is om na die Koninkryksboodskap te luister, moet ons ons nie laat afskrik nie. Filippi was die eerste stad in Europa waar die apostel Paulus die goeie nuus verkondig het. Toe valse beskuldigings teen hom en Silas ingebring is, is hulle al twee met stokke geslaan en in die gevangenis gegooi (Hand. 16:16-24). Maar daardie pynlike ondervinding het nie veroorsaak dat Paulus weens vrees ophou preek nie. Tydens sy besoek aan Tessalonika, die volgende stad op sy sendingreis, het hy ‘deur middel van God vrymoedigheid bymekaargeskraap’ (1 Tess. 2:2). Paulus se voorbeeld lig toe waarom ons “nie ophou” nie.—Gal. 6:9.
3. Wat kan veroorsaak dat party hulle gesindheid verander, al het hulle vroeër nie belanggestel nie?
3 Baie mense wat jare lank geweier het om te luister, het hulle gesindheid verander. ’n Ekonomiese terugslag, siekte, ’n gesinslid wat sterf of berigte van ontstellende gebeure op die wêreldtoneel kan so ’n verandering teweegbring (1 Kor. 7:31). Party wie se ouers teen ons boodskap gekant was, het volwassenes geword en is bereid om te luister. Ons volgehoue predikingswerk gee hulle die geleentheid om ‘die naam van Jehovah aan te roep’ voordat dit te laat is.—Rom. 10:13.
4. Wat beweeg ons om “sonder ophou” voort te gaan in die bediening?
4 “Sonder ophou”: Ons liefde vir God en ons naaste sal ons beweeg om, soos die apostels in die eerste eeu, “sonder ophou” voort te gaan met die predikings- en dissipelmaakwerk (Hand. 5:42). Vandag is daar baie mense wat “sug en steun oor al die verfoeilike dinge” wat nou plaasvind (Eseg. 9:4). Watter hoop en verligting bied dit hulle tog wanneer hulle die goeie nuus hoor! Selfs wanneer die meeste mense weier om te luister, het ons die versekering in die Skrif dat ons pogings vir Jehovah welbehaaglik is.—Heb. 13:15, 16.