Onderrig mense wat nie goed kan lees nie
1. Voor watter uitdaging kan ons in die bediening te staan kom?
1 In ons bediening kom ons soms te staan voor die uitdaging om mense wat sukkel om te lees, die waarheid te leer. Wat kan ons doen?
2. Hoe en waarom behandel ons mense wat nie goed kan lees nie met waardigheid?
2 Respekteer hulle waardigheid: Dit is ’n mens se hartstoestand wat vir Jehovah van belang is, nie sy sekulêre opleiding nie (1 Sam. 16:7; Spr. 21:2). Ons sien dus nie neer op mense wat nie goed kan lees nie. Dit is waarskynliker dat hulle ons hulp sal aanvaar as ons respek toon en geduldig is (1 Pet. 3:15). Dit kan behels dat ons nie daarop aandring dat hulle ’n teks of ’n paragraaf lees nie. Namate hulle meer kosbare Bybelwaarhede leer, sal hulle dalk gretiger wees om hulle leesvermoë te verbeter sodat hulle die vreugde kan smaak om God se Woord “dag en nag op gedempte toon” te lees.—Ps. 1:2, 3.
3. Watter onderrigmetodes kan gebruik word om mense te leer wat nie goed kan lees nie?
3 Onderrigmetodes tydens Bybelstudies: Prente is ’n uitstekende onderrigmiddel en geheuehulp. Jy kan die student vra wat hy sien in ’n prent in die publikasie wat julle gebruik. Vra dan spesifieke vrae om hom te help verstaan wat die prent ons leer. Gebruik tekste wat sekere aspekte van die prent uitlig. Die prente kan ook gebruik word om die les te hersien. Moenie te veel materiaal op ’n slag dek nie. Vestig die aandag op die tema en die hoofgedagtes van die les, en moenie ekstra materiaal inbring nie. Lees die tekste regstreeks uit die Bybel, en gebruik vrae om seker te maak dat die student verstaan wat gelees is. Dit kan sy begeerte aanwakker om sy leesvaardighede te verbeter sodat hy op sy eie na meer Bybelwaarhede kan soek.
4. Hoe kan ons ons student help om sy leesvaardighede te verbeter?
4 Hulpmiddele om beter te lees: Mense wat nie goed kan lees nie of min geleentheid gehad het om vlot te leer lees, verstaan en onthou inligting dalk baie goed. Jy kan hulle aanspoor om beskikbare oudio-opnames van ons publikasies te gebruik. As die persoon aandagtig na die leser luister terwyl hy in die gedrukte eksemplaar volg en selfs die woorde op gedempte toon herhaal, sal dit hom help om sy leesvaardighede te verbeter. Hy sal moontlik ook die brosjure Lê jou toe op lees en skryf nuttig vind. In party gebiede kan die ouer manne ook leesklasse in die gemeente reël. Met behulp van hierdie praktiese wenke kan ons mense wat nie goed kan lees nie, help om “die heilige geskrifte” te verstaan, wat hulle wys kan maak tot redding.—2 Tim. 3:15.