Hoe om mense te help wat sukkel om te lees

1. Waarom is dit ’n uitdaging om mense wat sukkel om te lees, die Bybel te leer?

¹ Huisbewoners wat sukkel om te lees, stel moontlik in geestelike dinge belang, maar hulle vind die Bybel en ander boeke dalk intimiderend. Om die Leer Bybel-boek vir hierdie mense aan te bied, sal moontlik min sukses oplewer, ten minste aan die begin. Hoe kan ons hulle geestelik help? Ons het ervare verkondigers in meer as 20 verskillende lande gevra wat hulle doen. Hulle gee die volgende wenke.

2. Watter hulpmiddele kan doeltreffend gebruik word om iemand te help wat sukkel om te lees?

² As die student se leesvermoë beperk is of hy glad nie kan lees nie, kan jy begin met ’n brosjure soos Luister na God en lewe vir ewig. ’n Pionier in die Verenigde State wys vir die persoon hierdie brosjure sowel as die Listen to God-brosjure en vra met watter een hy gemakliker is. Die takkantoor in Kenia sê dat hierdie hulpmiddele baie doeltreffend daar gebruik word omdat mense in Afrika tradisioneel geleer word deur middel van verhale eerder as vraag-en-antwoord-besprekings. Terwyl ’n geleerde persoon dalk maklik ’n metode sal aanvaar waarby daar gelees en vrae gevra word, sal hierdie metode iemand wat min skoolopleiding ontvang het, moontlik ongemaklik laat voel. As ’n student wel tot ’n mate kan lees, verkies baie verkondigers om te begin in die brosjures Goeie nuus wat van God kom! of Jy kán God se vriend wees! of dalk My boek met Bybelverhale.

3. Watter insig in mense wat nie kan lees nie, sal ons help om hulle doeltreffend te leer?

³ Prys: Mense wat nie geleer het om te lees nie, voel moontlik skaam en het dalk ’n swak gevoel van eiewaarde. Om hulle te help om gemaklik te voel, is dikwels die eerste stap om hulle die waarheid te leer. Die meeste mense wat nie kan lees nie, is intelligent en het die vermoë om te leer. Betoon aan hulle die respek wat hulle toekom en behandel hulle met waardigheid (1 Pet. 3:15). Hulle sal beweeg word om voort te gaan met die studie as hulle voel dat hulle pogings die moeite werd is en dat hulle geestelike vooruitgang maak. Prys hulle dus vryelik.

4. Hoe kan ons mense wat sukkel om te lees, aanspoor om voor te berei vir die studie?

⁴ Al kan die student nie goed lees nie, moet jy hom aanspoor om vir sy studie voor te berei. Party verkondigers in Suid-Afrika stel voor dat hulle studente hulp vra by ’n familielid of ’n vriend wat goed kan lees. ’n Verkondiger in Brittanje motiveer sy studente om voor te berei deur hulle sy boek vir ’n paar paragrawe gedurende die studie te laat gebruik sodat hulle kan sien hoeveel makliker dit is om die antwoorde te vind as dit onderstreep is. ’n Broer in Indië spoor sy studente aan om na die prente in die les vir die volgende week te kyk en vooraf daaroor na te dink.

5. Hoe kan ons toon dat ons geduldig is wanneer ons die studie hou?

⁵ Wees geduldig: Ongeag watter publikasie jy gebruik, beklemtoon die hoofgedagtes, en help die student om dit goed te verstaan. Aan die begin sal besprekings van 10 tot 15 minute miskien die beste wees. Moenie probeer om te veel materiaal te dek nie; dek dalk net ’n paar paragrawe tydens elke sessie. Wees geduldig as die student stadig lees. Hy sal waarskynlik beweeg word om sy leesvermoë te verbeter terwyl hy waardering vir Jehovah opbou. Om jou student te help om dit te doen, sal dit goed wees om hom van die begin af te nooi om vergaderinge by te woon.

6. Hoe kan ons iemand help om te leer lees?

⁶ As Bybelstudente leer om te lees, sal hulle vinniger geestelike vordering maak (Ps. 1:1-3). Baie verkondigers het hulle studente gehelp deur ’n paar minute aan die einde van elke studie uit die publikasie Lê jou toe op lees en skryf te oefen. As die student mismoedig word, kan jy dalk sy vertroue opbou deur dinge te meld wat hy wel geleer het om te doen. Verseker hom dat Jehovah sy pogings sal seën, en spoor hom aan om vir hulp te bid (Spr. 16:3; 1 Joh. 5:14, 15). Party verkondigers in Brittanje spoor hulle studente aan om redelike maar progressiewe doelwitte te stel—deur moontlik eers die alfabet onder die knie te kry, dan spesifieke tekste te vind en te lees en daarna uit vereenvoudigde Bybelpublikasies te lees. Om mense te help om te leer lees, behels dikwels dat ons hulle motiveer om dit te wil doen, en hulle nie net leer om dit te doen nie.

7. Waarom moet ons nie huiwer om die waarheid bekend te maak aan mense wat sukkel om te lees nie?

⁷ Jehovah sien nie neer op mense wat min skoolopleiding ontvang het nie (Job 34:19). Jehovah ondersoek ’n persoon se hart (1 Kron. 28:9). Moet dus nie huiwer om die waarheid bekend te maak aan mense wat sukkel om te lees nie. Jy het talle uitstekende hulpmiddele waarmee jy kan begin. Uiteindelik kan jy die studie in die Leer Bybel-boek voortsit en hom ’n meer afgeronde begrip van die Bybel gee.