Onderrig met eenvoud
1. Wat is ’n belangrike aspek van duidelike en doeltreffende onderrigting?
1 Eenvoud is ’n baie belangrike aspek van doeltreffende onderrigting. As ons kyk na hoe die Groot Leermeester, Jesus, onderrig het, kan dit ons help om ons “onderrigkuns” te verbeter.—2 Tim. 4:2; Joh. 13:13.
2. Wat behels dit om met eenvoud te onderrig, en watter uitwerking het hierdie soort onderrigting?
2 Gebruik eenvoudige taal: Die Bergpredikasie bevat van die diepste waarhede wat nog deur ’n mens geuiter is, en dit is alles eenvoudig gestel (Matt., hfst. 5-7). Die skare wat na Jesus geluister het, was “verstom . . . oor die manier waarop hy geleer het”. Beamptes wat gestuur is om hom in hegtenis te neem, is beweeg om te sê: “Nog nooit het ’n ander mens so gepraat nie” (Matt. 7:28, 29; Joh. 7:46). Ons hoef nie hoogdrawende woorde, ingewikkelde frases of komplekse illustrasies te gebruik sodat ander die waarheid oortuigend sal vind nie. Ons kan die waarheid goed verduidelik deur bekende woorde te gebruik.
3. Waarom oorweldig party soms hulle toehoorders met inligting, en hoe kan dit vermy word?
3 Bepaal die hoeveelheid: Jesus het sy toehoorders in ag geneem wanneer hy besluit het hoeveel inligting hy op ’n slag aan hulle sou oordra (Joh. 16:12). Ons moet oplettend en aanpasbaar wees in hierdie verband, veral wanneer ons vir familielede, nuwe belangstellendes of kinders getuig. Ons moet versigtig wees sodat ons hulle nie met inligting oorweldig nie, selfs wanneer dit dalk lyk asof hulle aandagtig luister. Opregtes van hart sal aanhou om kennis in te neem van die ware God, Jehovah.—Joh. 17:3; 1 Kor. 3:6.
4. Waarom is dit voordelig om op die hoofpunte eerder as die besonderhede te fokus?
4 Fokus op die hoofpunte: Jesus het nie sy onderrigting ingewikkeld gemaak deur te veel besonderhede in te sluit nie. Toe hy gesê het: “Almal wat in die gedenkgrafte is, . . . sal uitkom”, was dit nie vir hom die tyd om uit te wy oor die twee bestemmings van dié wat opgewek gaan word nie (Joh. 5:28, 29). Wanneer ons Bybelstudies hou, moet ons op die hoofpunte fokus en die versoeking weerstaan om onnodige bykomende materiaal in die bespreking in te bring.
5. Watter seën kan ons ontvang as ons met eenvoud onderrig?
5 Hoe dankbaar is ons tog dat Jehovah ons alles wat ons moet weet, met eenvoud geleer het! (Matt. 11:25). Laat ons ons daarop toelê om met eenvoud te onderrig sodat ons die vreugde van ’n produktiewe bediening kan smaak.