Drie wenke om jou onderrigvermoë te verbeter
1. Waarom moet ons ons onderrigvermoë probeer verbeter?
1 Alle Christenbedienaars is onderrigters. Hetsy ons iemand vir die eerste keer besoek, terugkeer om belangstelling te kweek of ’n Bybelstudie hou, ons dra inligting oor. En dit is nie net gewone inligting wat ons oordra nie. Ons werp lig op “die heilige geskrifte”, wat mense “wys kan maak tot redding” (2 Tim. 3:15). Wat ’n wonderlike voorreg! Hier volg drie wenke om ons onderrigvermoë te verbeter.
2. Hoe kan ons met eenvoud onderrig?
2 Eenvoud: Wanneer ons ’n onderwerp goed ken, vergeet ons soms hoe ingewikkeld die inligting kan wees vir iemand wat dit nie ken nie. Wanneer jy ’n Bybelstudie hou, moet jy dus nie jou onderrigting ingewikkeld maak deur talle onnodige besonderhede in te sluit nie. Beklemtoon eerder die hoofpunte. As ’n mens baie praat, beteken dit nie noodwendig dat jy ’n goeie onderrigter is nie (Spr. 10:19). Dit is gewoonlik die beste om net die sleuteltekste te lees. Nadat ’n teks gelees is, moet jy die aandag vestig op die aspek daarvan wat te doen het met die onderwerp onder bespreking. Die Bergpredikasie, wat in Matteus hoofstukke 5 tot 7 opgeteken is, bevat diepgaande waarhede, en tog het Jesus met eenvoud onderrig sonder om te veel woorde te gebruik.
3. Wat is die waarde van illustrasies, en watter soort illustrasies is dikwels die beste?
3 Prente: Illustrasies prikkel mense se gedagtes, wek hulle emosies en help hulle om dinge te onthou. Moenie dink dat jy ’n storieverteller hoef te wees om goeie illustrasies te gebruik nie. Jesus het dikwels kort, eenvoudige illustrasies gebruik (Matt. 7:3-5; 18:2-4). Eenvoudige prente wat op ’n stuk papier geteken word, kan ook baie nuttig wees. Met ’n bietjie beplanning kan jy met doeltreffende illustrasies vorendag kom.
4. Hoe kan ons vrae doeltreffend gebruik?
4 Vrae: Vrae vereis dat jou student dink. Wees dus geduldig nadat jy ’n vraag gevra het. As jy self die antwoord oorhaastig gee, sal jy nie werklik weet wat jou student verstaan nie. As hy verkeerd antwoord, sal dit dalk beter wees om hom nie bloot reg te help nie, maar hom eerder met bykomende vrae tot die regte gevolgtrekking te laat kom (Matt. 17:24-27). Nie een van ons is natuurlik ’n volmaakte onderrigter nie. Die Bybel spoor ons dus aan om voortdurend op ons onderrigting te let. As ons dit doen, sal dit ewige voordele meebring vir ons en vir dié wat na ons luister.—1 Tim. 4:16.