Loof Jehovah elke dag
1. Wat word God se knegte beweeg om te doen, en waarom?
1 Koning Dawid het sy vasbeslotenheid uitgespreek om Jehovah “die hele dag”, selfs tot onbepaalde tyd, te loof (Ps. 145:2, 7, 21). Ons het ook goeie rede om Jehovah elke dag te loof.—Ps. 37:10; 145:14, 18; 2 Pet. 3:13.
2. Hoe kan gesinne Jehovah elke dag loof?
2 In ons huis: Ons het opbouende publikasies wat ons kan help om betekenisvolle geestelike gesprekke te hê wanneer ons die dagteks bespreek, gedurende Gesinsaanbidding en wanneer ons vir gemeentelike vergaderinge voorberei. Baie gesinne maak dit ’n gewoonte om ten minste een maaltyd per dag saam te eet. Dit maak rustige, ontspanne gesprekke moontlik en bied geleenthede om Jehovah te loof. Sulke informele gesprekke wat deur ouers aangeknoop word, kan ’n belangrike hulpmiddel wees om kinders in “die dissipline en verstandsregulering van Jehovah” op te voed.—Ef. 6:4; Deut. 6:5-7.
3. Watter geleenthede het ons wanneer ons saam met ons broers is?
3 Saam met ons broers: Ons het uitstekende geleenthede om Jehovah saam met medegelowiges te loof wanneer ons in die velddiens of by gemeentelike vergaderinge is (Spr. 15:30; Fil. 4:8; Heb. 13:15). Aangesien ons en ons broers lief is vir Jehovah, behoort dit maklik te wees om opregte betuigings van waardering vir Jehovah se goedheid in te sluit wanneer ons met mekaar gesels.—Ps. 106:1.
4. In watter situasies kan jy Jehovah loof?
4 Wanneer ons met ongelowiges praat: Al laat omstandighede ons dalk nie toe om elke dag aan die openbare bediening deel te neem nie, kan selfs ’n kort gesprek met werksmaats, skoolmaats en ander oor Jehovah en sy voornemens opregtes van hart met hoop vervul (Ps. 27:14; 1 Pet. 3:15). Terwyl ’n suster per vliegtuig gereis het, het sy vir ’n medepassasier getuig, wat so vertroos en bemoedig was deur wat sy gehoor het dat sy haar adres en telefoonnommer vir die suster gegee het sodat hulle met mekaar in aanraking kon bly. Terwyl die wêreld se probleme toeneem en toestande versleg, bring Jehovah se volk steeds “goeie nuus van iets beters” vir diegene wat wil luister. Dit gee hoop aan ander en beweeg hulle om Jehovah te loof.—Jes. 52:7; Rom. 15:11.
5. Waarom is dit ons begeerte om Jehovah te loof, en wat kan dit teweegbring?
5 Hoe bly moet dit Jehovah tog maak om te hoor hoe sy knegte hom elke dag loof! Ons kan, net soos Jehovah se sigbare skepping om ons, elke dag lof vir hom by ons lippe laat uitborrel wanneer ons by die huis is, wanneer ons in die gemeente is en wanneer ons praat met dié wat nog nie lowers van Jehovah geword het nie.—Ps. 19:1-4.