Ons is te alle tye Getuies
1. Wat kan ons leer uit die verslag oor Jesus wat vir die vrou by die put getuig het?
1 Jesus het ure lank gestap. Hy was moeg en dors. Terwyl sy dissipels kos gaan koop het, het hy by ’n put buite ’n Samaritaanse stad gaan sit om te rus. Jesus was nie in Samaria om te preek nie; hy het bloot verby die stad gereis op pad na Galilea om sy bediening daar voort te sit. Nietemin het hy die geleentheid gebruik om vir ’n vrou te getuig wat water geskep het (Joh. 4:5-14). Waarom? Jesus het nooit opgehou om Jehovah se “getroue en waaragtige getuie” te wees nie (Op. 3:14). Ons volg Jesus na deur te alle tye Getuies van Jehovah te wees.—1 Pet. 2:21.
2. Hoe kan ons voorbereid wees om informeel te getuig?
2 Wees voorbereid: Ons kan voorbereid wees om informeel te getuig deur lektuur by ons te hê. Baie verkondigers hou traktate byderhand en laat dit by winkelassistente, petroljoggies en ander met wie hulle deur die dag in aanraking kom (Pred. 11:6). ’n Suster wat dikwels reis, maak seker dat sy altyd ’n Sakbybeltjie en ’n Leer Bybel-boek in haar handsak het, en sy probeer ’n gesprek aanknoop met dié wat langs haar sit.
3. Hoe kan ons ’n gesprek aanknoop?
3 Knoop ’n gesprek aan: Wanneer ons informeel getuig, hoef ons nie met ’n skriftuurlike onderwerp te begin nie. Jesus het nie die gesprek met die vrou by die put begin deur hom as die Messias te identifiseer nie. Hy het haar bloot gevra vir water om te drink, wat haar nuuskierigheid geprikkel het (Joh. 4:7-9). Een suster het gevind dat ’n soortgelyke benadering haar in staat stel om ’n gesprek aan te knoop wanneer sy gevra word of sy dit geniet het om ’n vakansiedag te vier. In plaas van te sê dat sy nie aan die viering deelgeneem het nie omdat sy een van Jehovah se Getuies is, sê sy: “Ek het persoonlik besluit om dit nie te vier nie.” Die nuuskierige persoon vra gewoonlik waarom, wat die suster die geleentheid gee om te getuig.
4. Waarom motiveer Matteus 28:18-20 jou?
4 Hoewel Jesus sy ywerige aardse bediening voltooi het, stel hy nog steeds opreg daarin belang dat die predikingswerk uitgevoer word soos hy dit gedoen het (Matt. 28:18-20). Daarom is ons, soos ons Voorbeeld Jesus, Getuies wat te alle tye gereed is om ’n openbare bekendmaking van ons geloof te doen.—Heb. 10:23.