Doen ek genoeg?
1. Watter bekommernisse het ’n getroue Christen dalk?
1 Het jy jou al ooit hierdie vraag afgevra? Jy doen miskien minder in die bediening weens gevorderde ouderdom, gesondheidsprobleme of groter gesinsverantwoordelikhede, en dit ontmoedig jou. Een suster met drie kinders het geskryf dat sy soms skuldig voel omdat die tyd en energie wat nodig is om na haar gesin om te sien, beperk wat sy in die bediening kan doen. Wat sal ons help om ’n gebalanseerde beskouing van sake te hê?
2. Wat verwag Jehovah van ons?
2 Wat Jehovah van ons verwag: Ons almal wil ongetwyfeld meer in die bediening doen. Maar daar is dikwels ’n groot verskil tussen wat ons graag wil doen en wat ons realisties gesproke kan doen. Die feit dat ons meer wil doen, toon dat ons nie selfvoldaan is nie. Ons moet onthou dat Jehovah goed weet wat ons beperkings is en dat hy nie meer van ons vereis as wat ons redelikerwys kan doen nie (Ps. 103:13, 14). Wat verwag hy van ons? Hy wil hê dat ons hom heelhartig moet dien, dat ons hom ons beste moet gee.—Kol. 3:23.
3. Hoe kan ons ons pogings in die bediening evalueer?
3 Wat sal ons help om te besluit wat vir ons realisties is? Ons kan Jehovah vra om ons te help sodat ons ons situasie objektief kan beskou (Ps. 26:2). ’n Vertroude, ryp Christenvriend wat ons goed ken en wat nie skroom om ons te sê as ons moet verbeter nie, kan ons ook help (Spr. 27:9). Onthou ook dat dit goed is om ons situasie gereeld te evalueer, aangesien omstandighede verander.—Ef. 5:10.
4. Hoe moet ons Bybelse herinneringe aangaande die bediening beskou?
4 Hoe om herinneringe te beskou: Gedurende ’n wedloop moedig ondersteuners die hardlopers dikwels aan. Die doel is om die hardlopers te help om hulle doelwit te bereik, nie om hulle te ontmoedig nie. Net so word die Bybelse aanmoediging en herinneringe wat ons by ons vergaderinge en in ons publikasies ontvang om ‘die woord dringend te verkondig’, tot ons voordeel gegee en beteken dit nie dat ons pogings op die een of ander manier nie goed genoeg is nie (2 Tim. 4:2). Ons kan vol vertroue wees dat Jehovah ons ‘liefde en werke’ met guns sal onthou solank ons aanhou om ons bes te doen.—Heb. 6:10.