Wek Jehovah se herinneringe ons geestelikop?
1 Die psalmis het Jehovah geloof en gesê: ‘U herinneringe is vir my van belang’ (Ps. 119:99, NW). Die Hebreeuse woord vir “herinneringe” dra die gedagte oor dat Jehovah ons weer laat dink aan wat in sy wette, sy bevele, sy voorskrifte, sy gebooie en sy insettinge uiteengesit word. As ons daaraan gehoor gee, sal dit ons geestelik opwek en ons gelukkig maak.—Ps. 119:2,NW.
2 As Jehovah se volk ontvang ons gereeld vermanings en raad. Ons het al baie daarvan voorheen gehoor. Hoewel ons hierdie aanmoediging waardeer, is ons geneig om te vergeet (Jak. 1:25). Jehovah voorsien geduldig liefdevolle herinneringe. Die apostel Petrus het van hierdie herinneringe opgeteken om ‘ons helder denkvermoëns op te wek sodat ons die gebooie van die Here sal onthou’.—2 Pet. 3:1,2.
3 Ons word keer op keer herinner aan die belangrikheid van persoonlike studie en vergaderingbywoning. Dit word gedoen omdat hierdie bedrywighede so belangrik vir ons geestelike welsyn is.—1 Tim. 4:15; Heb. 10:24,25.
4 Die grootste uitdaging vir party is om die Christelike opdrag om te preek uit te voer. Dit verg inspanning, vasberadenheid en volharding. Al vereis dit baie van ons, word ons gehelp om ‘vas te staan’ deur ons “voete geskoei met die toerusting van die goeie nuus” te hê.—Ef. 6:14,15.
5 Ons diens moet deur meer as net verstandelike bewustheid van Jehovah se vereistes beweeg word. Die apostel Paulus herinner ons daaraan dat die hart die motivering voorsien wat ons nodig het om “openbare bekendmaking tot redding” te doen (Rom. 10:10). As ons sterk geloof het en as ons hart tot Jehovah se herinneringe neig, sal ons gedring word om te praat sodat ons sy naam kan verheerlik.—Ps. 119:36, NW; Matt. 12:34.
6 Wanneer ons hard werk om goeie dade te verrig, verwag ons tereg dat dit ons vreugde sal verskaf (Pred. 2:10). Paulus identifiseer vreugde as ’n vrug van Jehovah se gees, en ons moet daarna strewe om dit in oorvloedige mate te openbaar (Gal. 5:22). Petrus het bygevoeg dat “ywerige inspanning” beloon sal word met ’n produktiewe bediening, wat vreugde voortbring.—2 Pet. 1:5-8.
7 Wanneer ons voor ’n uitdaging te staan kom, moet ons die apostels se ferm standpunt onthou toe hulle gesê het: “Ons kan nie ophou praat oor die dinge wat ons gesien en gehoor het nie” (Hand. 4:20). Ons word versterk om voort te gaan as ons onthou dat ‘ons deur dit te doen onsself sal red sowel as dié wat na ons luister’.—1 Tim. 4:16.
8 Ons vererg ons nie of voel nie gebelg omdat ons voortdurend herinneringe kry nie. Ons het eerder diepe waardering vir die oortreffende waarde daarvan (Ps. 119:129, NW). Ons is dankbaar dat Jehovah ons in hierdie kritieke tye aanhoudend herinneringe stuur om ons geestelik op te wek en ons te beweeg om ywerig in goeie werke te wees!—2 Pet. 1:12,13.