Is jou kinders gereed?
1. Waarom is dit nodig dat skoolkinders voorbereid moet wees?
1 Gedurende elke skooljaar sal jou kinders ongetwyfeld nuwe uitdagings en druk ervaar. Hulle sal ook nuwe geleenthede hê om “van die waarheid te getuig” (Joh. 18:37). Is hulle gereed hiervoor?
2. Wat moet jou kinders weet sodat hulle voorbereid kan wees?
2 Verstaan jou kinders goed wat deelname aan nasionalistiese seremonies en heidense vakansiedae uitmaak en waarom dit verkeerd is om daaraan deel te neem? Is hulle voorbereid vir die druk wat op hulle uitgeoefen sal word om hoër onderwys na te streef, om met iemand van die teenoorgestelde geslag uit te gaan en om alkohol of dwelms te gebruik? Sal hulle eenvoudig sê dat ’n afkeurenswaardige bedrywigheid teen hulle geloof is, of weet hulle hoe om hulle opvattings te verduidelik?—1 Pet. 3:15.
3. Hoe kan ouers die aand vir Gesinsaanbidding gebruik om hulle kinders voor te berei?
3 Gebruik die aand vir Gesinsaanbidding: Julle sal natuurlik dwarsdeur die skooljaar besprekings hê wanneer dit nodig is. As jy ’n spesiale poging aanwend om skoolverwante sake te bespreek voordat die skool weer begin, sal dit jou kinders selfvertroue gee. Gebruik gerus een of meer aande vir Gesinsaanbidding hiervoor. Jy kan jou kinders vra wat hulle die meeste angs by die skool veroorsaak. Sake wat julle in vorige jare bespreek het, kan hersien word noudat die kinders ouer is en ’n beter begrip het (Ps. 119:95). Jy kan oefensessies insluit waarby jy die rol van ’n onderwyser, raadgewer of skoolmaat speel. Leer jou kinders hoe om antwoorde uit die Bybel te gee en om hulpmiddele soos die Redenering-boek en die Jongmense vra-boeke te gebruik. Een ouer het oefensessies gebruik om haar kinders voor te berei om aan die begin van elke skooljaar na hulle nuwe onderwysers te gaan en vir hulle te vertel dat hulle Jehovah se Getuies is.—Sien Die Wagtoring, 15 Desember 2010, bladsye 3-5.
4. Wat sal wyse ouers doen?
4 Die uitdagings waarvoor jong Christene gedurende hierdie laaste dae te staan kom, word al ‘moeiliker om deur te kom’ (2 Tim. 3:1). Wyse ouers sal probeer om hierdie uitdagings vooruit te identifiseer (Spr. 22:3). Voordat hierdie uitdagings opduik, moet jy alles in jou vermoë doen om jou kinders te help om gereed te wees.