Wees versigtig terwyl jy in die bediening is
1. Waarom is dit nodig om versigtig te wees in die bediening?
1 “Soos skape onder wolwe” preek God se knegte “te midde van ’n verdorwe en verdraaide geslag” (Matt. 10:16; Fil. 2:15). Ontstellende berigte van burgerlike onrus, massageweld en wrede ontvoerings is iets algemeens en is ’n bewys dat goddelose mense voortgaan “van kwaad tot erger” (2 Tim. 3:13). Watter Bybelbeginsels kan ons toepas wat ons sal help om ‘versigtig te wees’ in die bediening?—Matt. 10:16.
2. Onder watter omstandighede sal dit dalk raadsaam wees om die gebied te verlaat en êrens anders te gaan preek?
2 Tree skerpsinnig op: Spreuke 22:3 beklemtoon die wysheid daarvan om ons te “verberg” sodat rampspoed ons nie tref nie. Bly waaksaam! Toestande in ’n buurt wat gewoonlik veilig is, kan onverwags verander. Jy sien dalk dat daar meer polisiebedrywigheid is of dat ’n skare in die straat begin saamdrom. Partykeer sal ’n vriendelike huisbewoner jou waarsku. Dit sal skerpsinnig van jou wees om nie uit nuuskierigheid in die buurt te bly nie, maar eerder so gou moontlik die gebied te verlaat en êrens anders te gaan preek.—Spr. 17:14; Joh. 8:59; 1 Tess. 4:11.
3. Hoe is die beginsel in Prediker 4:9 op ons bediening van toepassing?
3 Werk saam: “Twee is beter as een”, sê Prediker 4:9. Dit was vroeër miskien vir jou veilig om alleen in die bediening te werk, maar is dit nog steeds veilig? In party gebiede is dit. Maar in ander gebiede is dit nie raadsaam vir ’n suster of ’n jongmens om alleen van deur tot deur te werk nie, veral nie ná sononder nie. Die ondervinding het al geleer dat ’n oplettende metgesel uiters waardevol is (Pred. 4:10, 12). Hou voortdurend ’n wakende oog oor die ander in jou groep. Maak dit ’n gewoonte om vir die ander te sê wanneer jy die gebied verlaat.
4. Hoe kan ons tot die veiligheid van almal in die gemeente bydra?
4 As diegene wat ‘oor ons siel waak’, het die ouer manne die verantwoordelikheid om praktiese leiding te voorsien na gelang van die plaaslike omstandighede (Heb. 13:17). Ons kan seker wees van Jehovah se seën terwyl ons Christelike beskeidenheid openbaar en die ouer manne ons volle samewerking gee (Miga 6:8; 1 Kor. 10:12). Mag al God se knegte daartoe bydra dat ’n doeltreffende getuienis in ons gebied gegee word, maar altyd met die gepaste versigtigheid.