Sien die goeie weens jou harde werk
1. Wat kan ons ywer vir die bediening laat verflou?
1 Die mens is gemaak om “die goeie [te] sien weens sy harde werk” (Pred. 2:24). Maar wanneer ons nie goeie resultate in ons bediening het nie, kan ontmoediging ons van vreugde beroof en ons ywer laat verflou. Wat kan ons help om ’n positiewe gesindheid te behou?
2. Waarom moet ons realistiese verwagtinge koester oor die reaksie op ons bediening?
2 Koester realistiese verwagtinge: Onthou dat Jesus se bediening ongetwyfeld ’n sukses was, al het min mense gunstig gereageer (Joh. 17:4). Jesus het in sy illustrasie van die saaier voorspel dat die meeste harte uiteindelik nie ontvanklik sou wees vir die Koninkryksboodskap, wat soos saad is, nie (Matt. 13:3-8, 18-22). Nietemin rig ons nog steeds baie uit deur ons ywerige inspanning.
3. Hoe kan ons “vrug dra”, al reageer min mense gunstig op ons predikingswerk?
3 Hoe ons veel vrug dra: Volgens Jesus se illustrasie sou diegene wat die boodskap aanneem, “vrug dra” (Matt. 13:23). Nadat ’n koringhalm uitgespruit en ryp geword het, is die vrug wat dit voortbring nie klein koringhalmpies nie, maar nuwe saad. Die vrug wat suksesvolle Christene voortbring, is dus nie noodwendig nuwe dissipels nie, maar die vermenigvuldiging van Koninkryksaad—ons verkondiging van die Koninkryk. Dit lei daartoe dat ons baie van “die goeie” sien, waaruit ons bevrediging kan put, hetsy mense gunstig reageer of nie. Ons dra by tot die heiliging van Jehovah se naam (Jes. 43:10-12; Matt. 6:9). Ons geniet die voorreg om God se medewerkers te wees (1 Kor. 3:9). En hierdie “vrug van die lippe” behaag Jehovah.—Heb. 13:15, 16.
4. Watter resultate kan ons bediening hê sonder dat ons daarvan weet?
4 Daarbenewens het ons inspanning dalk resultate wat ons nie sien nie. Dit is moontlik dat party wat Jesus gehoor preek het, eers sy dissipels geword het nadat hy sy aardse bediening voltooi het. Net so sal Koninkryksaad wat ons saai, dalk eers later in ’n persoon se hart wortelskiet en groei, en hy kom dalk in die waarheid sonder dat ons daarvan weet. Ja, ons bediening rig baie uit. Laat ons dus “veel vrug bly dra” en toon dat ons Jesus se dissipels is.—Joh. 15:8.