Ondervindinge

◼ Australië: John, ’n geleerde man, het as kind kerk toe gegaan, maar hy het ’n “volslae ateïs” geword. ’n Pionier het die brosjure Is lewe geskep? by hom gelaat, en toe op ’n latere besoek die Oorsprong van lewe-brosjure. Die pionier het aangehou om sy belangstelling te kweek deur vir hom die nuutste tydskrifte te bring en sy aandag te vestig op enige artikels oor die skepping of Bybelprofesieë. Toe hy gedink het dat John gereed is, het hy vir hom die boek Die Bybel—God se woord of die mens s’n? aangebied. Nadat John dit gelees het, het hy hom begin beskryf as “ietwat van ’n agnostikus”. Toe het die pionier die Leer Bybel-boek begin gebruik en John se aandag gevestig op paragraaf 8 op bladsy 20 en paragrawe 13-16 op bladsye 23-24. Die teksverwysings in die materiaal het John so beïndruk dat hy gesê het: “Miskien moet ek die Bybel nog ’n kans gee.”

◼ Mexiko: ’n Man het vir ’n verkondiger gesê dat hy nie glo dat die Bybel deur God geïnspireer is nie. Die verkondiger het aangebied om aan hom te bewys dat die Bybel geïnspireer is. Ná ’n paar besprekings het die dinge wat hy uit die Bybel geleer het, ’n uitwerking op die man se hart begin hê. Hy was diep getref toe hy van goddelike standaarde geleer het. Hy het vir die verkondiger gesê: “Aan die begin, wanneer ek en jy die Bybel saam gelees het, het dit vir my geklink soos raad uit enige ander boek, en dit het geen uitwerking op my gehad nie. Maar wanneer ons nou daaruit lees, veral die raad wat dit oor sedelikheid bevat, word my hart seer.”

◼ Verenigde State: Terwyl ’n egpaar aan spesiale getuieniswerk in stede deelgeneem het, het hulle ’n vrou van Taiwan ontmoet wat aan God geglo het, maar gedink het dat die Bybel vir Westerlinge is. Sy het na hulle lektuuruitstalling gekom omdat sy verlore gevoel het, al was sy welaf. Sy het gehoop dat die Bybel haar sou help om ’n doel in die lewe te vind. Die egpaar het uit die Leer Bybel-boek en die brosjure Lasting Peace and Happiness—How to Find Them met haar begin studeer. Pleks daarvan om hoofstuk 2 in die boek te studeer, het hulle die deel in die brosjure met die titel “A Guidebook for the Blessing of All Mankind” bespreek. Nadat hulle die eerste ses paragrawe in daardie deel bespreek het, het die vrou haar verbasing uitgespreek oor die feit dat die Bybel so uniek in vergelyking met ander godsdiensgeskrifte is. Nadat hulle Bybelprofesieë ondersoek het wat vervul is, het sy gesê: “Ek kan aan geen ander boek dink wat so akkuraat is as die Bybel nie!”

◼ Japan: Hoewel ’n huisbewoner vir ’n verkondiger gesê het dat hy nie aan God glo nie, het die verkondiger aangehou om hom kortliks te besoek en vir hom die Ontwaak!-artikels met die titel “Is dit ontwerp?” gewys. Die man het sy beskouing geleidelik verander en begin erken dat dit moontlik is dat ’n Skepper bestaan. Nou glo hy dat daar wel ’n God is, en die verkondiger studeer die brosjure Goeie nuus wat van God kom! met hom.

◼ Kanada: ’n Suster het die jongste tydskrifte by ’n vrou gelaat wat uit haar huis uitgekom het op pad na haar motor. Toe die suster later teruggekeer het, het die vrou prontuit vir haar gesê dat sy nie belangstel nie en nie aan God glo nie. Die suster het besluit om nie tou op te gooi nie, maar om die brosjure A Satisfying Life—How to Attain It vir haar te neem. Toe die suster die vrou tuis gevind het, het sy vir haar gesê dat sy weet dat die vrou nie aan God glo nie, maar dat sy aan haar gedink het omdat die suster weet dat sy ’n enkelouer is. Sy het vir die vrou paragraaf 6 op bladsy 4 van die brosjure gewys, wat bespreek waar ’n mens goeie raad kan vind. Daarna het sy die vrou aangespoor om die wenke in les 2 te lees wat handel oor hoe om kinders groot te maak. Die vrou het die brosjure met graagte geneem.