Kweek die gewoonte aan om stiptelik te wees
1. Watter voorbeeld stel Jehovah wanneer dit by stiptelikheid kom?
1 Jehovah is altyd stiptelik. Hy gee sy knegte byvoorbeeld “hulp op die regte tyd” (Heb. 4:16). Hy voorsien ook geestelike “voedsel op die regte tyd” (Matt. 24:45). Ons kan dus die vertroue hê dat die komende dag van sy toorn “nie laat [sal] wees nie” (Hab. 2:3). Hoe vind ons tog by Jehovah se stiptelikheid baat! (Ps. 70:5). Maar omdat ons besige, onvolmaakte mense is, kan dit vir ons ’n groot uitdaging wees om stiptelik te wees. Waarom moet ons die gewoonte aankweek om stiptelik te wees?
2. Waarom strek stiptelikheid Jehovah tot eer?
2 Stiptelikheid is iets ongewoons gedurende hierdie laaste dae, aangesien baie mense liefhebbers van hulleself en sonder selfbeheersing is (2 Tim. 3:1-3). Wanneer Christene dus betyds is vir die werk, vir afsprake en vir vergaderinge, let ander dit op en strek dit Jehovah tot eer (2 Pet. 2:12). Is ons gewoonlik betyds vir die werk, maar dikwels laat vir teokratiese vergaderinge? As ons betyds is vir Christelike vergaderinge, insluitende die openingslied en -gebed, toon ons dat ons ons ordelike hemelse Vader wil navolg.—1 Kor. 14:33, 40.
3. Waarom toon dit bedagsaamheid teenoor ander wanneer ons stiptelik is?
3 Stiptelikheid toon ook bedagsaamheid teenoor ander (Fil. 2:3, 4). As ons byvoorbeeld betyds is vir Christelike vergaderinge, insluitende velddiensvergaderinge, sal ons medeaanbidders nie onnodig steur nie. Aan die ander kant, as ons dikwels laat is, skep dit die indruk dat ons dink dat ons tyd waardevoller is as hulle s’n. Stiptelikheid toon dat ons betroubaar en pligsgetrou is—eienskappe wat deur ander waardeer word.
4. Hoe kan ons verbeter as ons dikwels laat is?
4 As jy dikwels laat is, moet jy nadink oor die redes daarvoor. Wees meer georganiseerd deur ’n realistiese rooster uit te werk wat jou in staat stel om take op hulle vasgestelde tyd af te handel (Pred. 3:1; Fil. 1:10). Vra Jehovah om hulp (1 Joh. 5:14). Om stiptelik te wees, is een manier waarop ons waardering toon vir die twee grootste gebooie in die Wet—om God en ons naaste lief te hê.—Matt. 22:37-39.