Hoe om by ’n lektuuruitstalling te getuig

Getuieniswerk met behulp van ’n lektuurtrollie of -tafel is ’n baie doeltreffende metode om opregtes van hart na die waarheid te trek (Joh. 6:44). Daarom is ouer manne aangespoor om openbare getuieniswerk te organiseer in dele van die gemeente se gebied waar daar baie voetgangers is. Aangesien mobiele lektuuruitstallings verskuif kan word, is dit gewoonlik nie nodig om die owerheid vir toestemming te vra nie. Wie mag aan hierdie aspek van die bediening deelneem? Verkondigers wat goeie oordeel aan die dag lê, ’n waardige voorkoms het en die vermoë het om goeie gesprekke te voer. Hieronder is ’n paar moets en moenies wat verkondigers sal help om meer sukses te behaal.

Die moets:

Wees vriendelik, verwelkomend en behulpsaam teenoor verbygangers. Party verkondigers glimlag hartlik en opreg en groet vriendelik. As iemand na die uitstalling kyk terwyl hy verbyloop, kan jy sê: “Jy kan iets neem as jy wil.”
Staan op ’n gepaste afstand van die uitstalling. Op party plekke vind verkondigers dat dit doeltreffend is om binne ’n paar treë van die uitstalling te staan. Ander vind dat hierdie metode verbygangers afskrik, en daarom staan hulle ’n bietjie verder weg en wag hulle totdat iemand by die uitstalling stop. Probeer dan ’n gesprek met die persoon aanknoop, deur miskien te vra: “Het jy al oor hierdie vraag gewonder?”
Gebruik die Bybel so dikwels as moontlik.
Verduidelik die Bybelstudiereëling aan enigiemand wat een van ons studiepublikasies, soos die Leer Bybel-boek, neem. Bied aan om die video Waarom moet jy die Bybel studeer? op ’n elektroniese toestel vir hom te wys.
Kry belangstellendes se kontakbesonderhede, indien moontlik.