Volg hulle geloof na
1. Wat sal ons vanaf die week van 19 Oktober tydens die Gemeentelike Bybelstudie studeer?
1 Gedurende die week van 19 Oktober 2015 sal ons die boek Volg hulle geloof na tydens die Gemeentelike Bybelstudie begin studeer. Hierdie publikasie bespreek die Bybelverslae van 14 manne en vroue van geloof. Dit is geskryf op ’n manier wat hierdie getroue persone in ons verbeelding laat lewe, en dit help ons om hulle te sien as werklike persone wat voor uitdagings te staan gekom het in hulle diens aan Jehovah. Die boek vestig ook die aandag op lesse uit hierdie verslae wat ons persoonlik kan toepas.—Heb. 6:12.
2. Wat is ’n paar kenmerke van die boek Volg hulle geloof na?
2 Kenmerke: Die boek bevat ’n tydlyn en kaarte om ons te help om vas te stel waar en wanneer elke Bybelkarakter gelewe het. Elke hoofstuk bevat ook ’n gedeelte met die titel: “Om oor na te dink . . . ”, wat ons sal help om oor die verslae te peins en om die praktiese lesse wat ons geleer het, toe te pas. Die boek bevat ook kleurvolle, gedetailleerde prente en goed nagevorste kunswerk wat help om die verhale te laat lewe.
3. Wat kan ons doen om baat te vind by ons studie van hierdie publikasie?
3 Hoe jy kan baat vind: Die inleidingsbrief van die Bestuursliggaam spoor ons aan om die volgende te doen: “Gebruik jou verbeelding; leef jou in die verhale in. Probeer voel wat daardie Bybelkarakters gevoel het en probeer sien wat hulle gesien het. Vergelyk hoe hulle in ’n sekere situasie gereageer het met hoe jy waarskynlik sou gereageer het.” Ons moet ons verbeelding gebruik, maar dit beteken natuurlik nie dat ons te veel moet spekuleer nie. Ons wil die geïnspireerde verslag eerder visualiseer en meegevoel hê met die Bybelkarakters. Dit verg tyd en bepeinsing (Neh. 8:8). As die les in die middel van ’n hoofstuk begin, sal die studiehouer die bespreking inlei met ’n 30 tot 60 sekonde lange hersiening van die vorige les. As die les nie die gedeelte: “Om oor na te dink . . . ” insluit nie, kan een of twee vrae ter hersiening gevra word.
4. Waarom moet ons die boek Volg hulle geloof na studeer?
4 Ons lewe in ’n wêreld wat ons geloof elke dag op die een of ander manier probeer ondermyn of verswak. Hierdie boek—sowel as die reeks in Die Wagtoring waarop dit gebaseer is—is ’n gawe van Jehovah om ons te help om ons geloof te versterk (Jak. 1:17). Mag ons ten volle hierby baat vind deur die Gemeentelike Bybelstudie gereeld by te woon en deur so veel as moontlik kommentaar te lewer terwyl ons hierdie publikasie saam studeer!