‘Getuig deeglik’ oor God se Koninkryk
1. Wat sal ons vanaf die week van 14 Maart tydens die Gemeentelike Bybelstudie studeer?
1 Vanaf die week van 14 Maart 2011 sal ons ‘Getuig deeglik’ oor God se Koninkryk tydens die Gemeentelike Bybelstudie studeer. Hierdie publikasie bespreek die boek Handelinge op so ’n wyse dat die leser self die opwinding van die dramatiese gebeure daarin kan voel. Die Getuig-boek is nie ’n vers-vir-vers-bespreking nie, maar bevat eerder lesse uit die verslae in Handelinge en help ons om te sien hoe ons dit persoonlik kan toepas.—Rom. 15:4.
2. Verduidelik party kenmerke van die Getuig-boek.
2 Kenmerke van die boek: Die inleiding op bladsy 2 is ’n hartlike brief van die Bestuursliggaam oor hoe hulle wil hê dat ons by hierdie publikasie moet baat vind. Vanaf hoofstuk 2 is daar ’n fokusreël wat die kerngedagte van elke hoofstuk bevat, asook ’n teksverwysing wat toon watter deel van Handelinge bespreek gaan word. Baie van die hoofstukke bevat leersame vensters wat agtergrondinligting oor mense, plekke of gebeure verstrek. Breë kantruimtes stel ons in staat om aantekeninge te maak. Dwarsdeur die boek is daar fyn gedetailleerde prente van Bybelse tonele om ons te help om belangrike gebeure te visualiseer, en op die laaste bladsy is ’n nuttige indeks van prente om te verduidelik wat in verskillende prente uitgebeeld word. Aan die binnekant van die voor- en agterblad is daar kaarte om ons te help om die vordering van medeaanbidders in die eerste eeu te volg toe hulle die goeie nuus “tot in die mees afgeleë deel van die aarde” begin versprei het.—Hand. 1:8.
3. Watter belangrike vrae sal ons studie van die boek Handelinge beantwoord?
3 Antwoorde op belangrike vrae: ’n Bespreking van die boek Handelinge sal ons help om die antwoorde op belangrike vrae oor die Christelike bediening duidelik te sien. Byvoorbeeld, watter werk en boodskap kenmerk ware volgelinge van Jesus Christus? Wie rig hierdie wêreldwye predikingswerk, en hoe? Watter geleenthede skep vervolging en teenstand vir bedienaars? Watter rol speel die heilige gees in ons bediening?
4. Hoe kan ons ten volle by ons studie van hierdie publikasie baat vind?
4 As ons ten volle by die studie wil baat vind, moet ons die materiaal vooraf bestudeer en voorberei om aan die gemeentelike bespreking deel te neem. Woon elke vergadering by, en peins oor hoe jy die lesse in jou persoonlike bediening kan toepas. Mag ons studie van hierdie opwindende publikasie ons aanspoor om deeglik te getuig oor God se Koninkryk!—Hand. 28:23.