Oudio-opnames—Hoe om dit te gebruik
1. Watter nuttige voorsiening het ons behalwe ons geskrewe publikasies?
1 Baie mense geniet dit om jw.org te gebruik om aangename en korrekte woorde van waarheid te lees (Pred. 12:10). Maar het jy al die oudio-opnames gebruik? Hierdie opnames maak dit vir ons moontlik om na baie van die inligting op ons webwerf te luister. Hoe kan ons by oudio-opnames baat vind?
2. Hoe kan ons oudio-opnames vir ons persoonlike of gesinstudie gebruik?
2 Vir ons persoonlike of gesinstudie: Wanneer ons na oudio-opnames van die Bybel, die tydskrifte of ’n publikasie luister terwyl ons reis of met alledaagse dinge besig is, kan dit ons help om ons tyd beter te benut (Ef. 5:15, 16). Ons kan ook tydens ons gesinsaanbidding na materiaal luister wat voorgelees word terwyl ons dit in ons eksemplaar van die publikasie volg. Dit is veral nuttig om oudio-opnames tydens persoonlike studie te gebruik as ons ons leesvermoë wil verbeter of ’n taal leer.
3. Wie in ons gebied sal moontlik by oudio-opnames baat vind?
3 Vir die bediening: Mense in ons gebied wat meen dat hulle te besig is om te lees, sal dalk bereid wees om na oudio-opnames te luister. Of ons kom dalk mense teë wat ’n ander taal praat en meer geredelik sal luister as hulle die Koninkryksboodskap in hulle “eie taal” hoor (Hand. 2:6-8). In sommige kulture is dit baie belangrik om te luister. Byvoorbeeld, in die Hmong-kultuur dra mense gewoonlik hulle geskiedenis mondelings aan die jonger geslag oor, en hulle het die vermoë om die inligting wat hulle hoor, goed te onthou. In baie Afrika-kulture geniet mense dit om te leer deur na stories te luister.
4. Watter vrae kan ons ons afvra oor hoe ons mense in ons gebied kan help?
4 Sal dit in julle gebied nuttig wees om vir ’n huisbewoner ’n oudio-opname in sy taal te speel? Sal iemand dalk daarby baat vind as ons vir hom ’n oudio-publikasie per e-pos stuur? Kan ons ’n oudio-publikasie op ’n CD aflaai en dit vir ’n belangstellende gee, miskien saam met die gedrukte publikasie? Elke volledige elektroniese boek, brosjure, tydskrif of traktaat wat ons vir iemand in die bediening gee, mag gerapporteer word. Ons kan oudio-opnames in ons persoonlike studie gebruik, asook om saadjies van Koninkrykswaarheid te saai.—1 Kor. 3:6.