Gebruik kenmerke van die Leer Bybel-boek op doeltreffende wyse

Namate ’n Bybelstudent leer wat die Bybel werklik leer en Bybelkennis toepas, sal hy groei en geestelike vrugte dra (Ps. 1:1-3). Ons kan ons student help om te vorder deur goed gebruik te maak van party nuttige kenmerke van die Leer Bybel-boek.

Inleidende vrae: Elke hoofstuk begin met vrae wat in die les beantwoord word. Jy kan hierdie vrae as retoriese vrae vra om die student se belangstelling vir die bespreking te wek. Of jy kan hom vra om elke vraag kortliks te beantwoord. As hy ’n verkeerde antwoord gee, hoef jy hom nie dadelik reg te help nie. Sy antwoorde sal jou help om vas te stel watter punte aandag nodig het en beklemtoon moet word.—Spr. 16:23; 18:13.

Aanhangsel: As die student die inligting in die hoofstuk verstaan en aanvaar, kan jy hom aanspoor om die bykomende inligting in die aanhangsel op sy eie deur te gaan. By die volgende studie kan jy ’n paar minute gebruik om seker te maak dat hy dit verstaan. Maar as jy meen dat die student meer daarby sal baat vind as jy die inligting in die aanhangsel of ’n gedeelte daarvan bespreek, moet jy gedurende die studie tyd neem om dit te doen deur die paragrawe te lees en vrae te vra wat jy voorberei het.

Hersieningsvenster: Die hersieningsvenster aan die einde van elke hoofstuk bevat stellings wat die inleidende vrae beantwoord. Jy kan hierdie kenmerk gebruik om seker te maak dat jou student die hoofpunte verstaan en kan verduidelik. Lees elke stelling sowel as die tekste wat aangegee word, hardop saam met hom. Vra jou student dan om die teks(te) te gebruik om te verduidelik waarom die stelling waar is.—Hand. 17:2, 3.