Volg die Groot Leermeester na wanneer jy die Leer Bybel-boek gebruik
1. Hoe het Jesus onderrig?
1 Die Groot Leermeester, Jesus, het sake altyd op ’n eenvoudige, verstaanbare manier verduidelik. Soms het hy sy toehoorders gehelp om te dink deur eers hulle mening te vra (Matt. 17:24-27). Hy het die aandag op God se Woord gevestig (Matt. 26:31; Mark. 7:6). Hy was versigtig om sy dissipels nie met te veel inligting te oorweldig nie, want hy het geweet dat hulle sou aanhou leer (Joh. 16:12). Jesus wou ook graag weet of sy dissipels glo en verstaan wat hy hulle leer (Matt. 13:51). Die Leer Bybel-boek is saamgestel om ons te help om op ’n soortgelyke manier te onderrig.
2. Hoe kan ons die inleidende vrae vir elke hoofstuk gebruik?
2 Inleidende vrae: Wanneer jy met ’n hoofstuk begin, is dit goed om die aandag op die inleidende vrae onder die opskrif te vestig. Vra dit as retoriese vrae om die student se belangstelling te wek. Of jy kan hom nooi om die vrae kortliks te beantwoord. Dit is nie nodig om sy opmerkings breedvoerig te bespreek of elke verkeerde stelling reg te stel nie. Jy kan hom eenvoudig vir sy gedagtes bedank en die inligting begin bespreek. Sy antwoorde op die inleidende vrae sal jou help om te weet of jy meer aandag aan ’n sekere deel van die les moet skenk.
3. Hoe kan ons die studie eenvoudig hou?
3 Tekste: Die tekste moet die middelpunt van die studie wees (Heb. 4:12). Maar dit is nie nodig om elke teksverwysing te lees nie. Beklemtoon dié wat die skriftuurlike grondslag vir ons opvattings toon. Tekste wat agtergrondinligting gee, hoef dalk nie gelees te word nie. Die Leer Bybel-boek bied die waarheid op ’n eenvoudige manier aan. Hou dus die studie eenvoudig. Spits die aandag op die hoofgedagtes toe, en moenie te veel oor besonderhede gesels of ekstra inligting onnodig in die bespreking inbring nie.
4. Wat bepaal of ons tydens die studie tyd moet inruim om inligting in die aanhangsel te bespreek?
4 Aanhangsel: Die aanhangsel dek 14 onderwerpe wat die hoofteks aanvul. Hierdie onderwerpe hoef nie tydens die studie bespreek te word nie. Jy besluit dalk om jou student aan te spoor om die aanvullende inligting oor party onderwerpe op sy eie te lees, veral as hy die inligting in die hoofteks verstaan en aanvaar. As die student byvoorbeeld reeds glo dat Jesus die Messias is, is dit miskien nie nodig om saam met hom deur “Jesus Christus—die beloofde Messias” te gaan wanneer julle hoofstuk 4, “Wie is Jesus Christus?” bespreek nie. By ander geleenthede is dit dalk voordelig om tydens die studie tyd in te ruim om die inligting in die aanhangsel of ’n deel daarvan te bespreek.
5. Hoe kan ons te werk gaan as ons besluit om inligting in die aanhangsel te bespreek?
5 As jy besluit om die inligting in die aanhangsel te bespreek, kan jy voor die tyd vrae voorberei en die paragrawe met die student bespreek soos jy in die hoofteks doen. Of jy kan, na gelang van die student se behoeftes, besluit om ’n paar minute tydens die studie in te ruim om die inligting met hom te hersien. Dit sal jou in staat stel om seker te maak dat hy die inligting verstaan wat hy op sy eie gelees het.
6. Hoe kan die hersieningsvenster aan die einde van elke studie gebruik word?
6 Hersieningsvenster: In die venster aan die einde van elke hoofstuk is daar stellings wat gewoonlik die inleidende vrae beantwoord. Jy kan hierdie stellings gebruik om die hoofgedagtes van die hoofstuk te hersien. Party verkondigers het dit nuttig gevind om elke stelling en miskien die bygaande tekste saam met die student te lees. Daarna vra hulle die student om kortliks te verduidelik hoe die tekste die stelling bewys. Die onderrigter kan dan sien of die student die hoofgedagtes van die les en hoe hulle deur die Bybel gestaaf word, goed verstaan en daarmee saamstem. Dit lei die student ook op om die Bybel te gebruik om die waarheid aan ander te verduidelik.
7. Hoe kan ons die Leer Bybel-boek gebruik om ons opdrag uit te voer?
7 Die doeltreffendste manier waarop ons ons opdrag kan uitvoer om mense te leer en om dissipels te maak, is om Jesus se onderrigmetodes na te volg (Matt. 28:19, 20). Die Leer Bybel-boek kan ons help om dit te doen. Maak goeie gebruik daarvan om die waarheid op ’n duidelike, eenvoudige en interessante manier aan ander te leer.